Vawiin chawhnu dar 1:30Pm khan Siaha District Superintendent of Police Pu SD Mishra Office Chamber-ah Pu Joseph Lalchhuana, DIG (Southern Range) chuan Siaha District MJA te a kawm. Pu Joseph Lalchhuana hian tunhnaia Chhaolo khuaa tualthahna thleng kal zela ni 23rd September zana Siaha Police Station beih a nih dan te leh Siaha Police inrelbawl dan te a hmun ngeia thlithlaia zirchiang turin tukin zing khan Siaha a thleng a ni.

Pu Joseph Lalchhuana chuan Chhaolo khuaa tualthahna rapthlak tak thleng chu pawi a tihtak zet thu sawiin, vanduaina tawk Pi.N.Sidei (70) leh Nula Z.Elizabeth (32) te chhung chu rilru leh thinlung takin a tawrhpui thu a sawi a. He tualthahna Case hi Blind Case (Vanduaina thlenna hmun-ah Evidence awmthei tur thil te lo khawi chingpen/tih rilral zawh vek tawh) ni mahse MTP (Gen.Hqrs) , MTP Chhaolo leh MTP Lobo Branch ten Police an tawiawm that avangin tualthattu K.Vanlalpianga chu an man chhuak thei ta a ni , a ti. Siaha District mipui te hian Siaha District Police tha tihchak zual sauh turin lo tawiawm tlat zel u la, finchhuah an ngaihna laiah lo finchhuahin, Police te hi inrawngbawltu an ni a, chak taka inrawng an bawl thei nan intawiawmna leh duhsakna hi an mamawh reng thin dawn a ni, a ti bawk. Social Media a thil in Post na zawng hi thudik a ni lo tih kan hriat a hun tawh a, Source dik ngei (Genuine Source) a ni em tih hriat tum hram tur a ni. MJA ten mipui tihchi-ai thei thudiklo Post a awm changin, a dik lo zia mipui te hrilhriat vat thin turin a ngen a. Police kaihnawi thil hre duh chuan Facebook-a Police Department siam Group atang te a en thin turin Siaha mipui te a ngen bawk a ni.

Pu Joseph-a chuan misual tualthattu Police kuta a awm tawh hnu a, “A hmel kan hmu duh” ti a Police Station hial beih a ni erawh hi chu hriatthiam har a ti thu sawiin, mipui te hian Police te hi Dan leh Thupek kenkawhna kawngah harsatna siam loh va, tanpui zawk tur kan ni, a ti bawk. Tunah hian September ni 23 zana Police Station beihtu chhuihzui hna kalpui mek a ni a, mi 6 man tawh an ni a, U/s IPC Section 4272/153/186/353/34 hnuaia Case Registered a ni, a ti.

Pu Joseph chuan MJA member te zawhna hrang hrang chhangin, Police indaih lohna chungchangah chuan Siaha District hi chhimlamah chuan a zia ber kan ni zawk a ni. Lunglei District-ah Police 291 an awm mek a, Chu chu mi 530 tan police 1 ang an ni a, Lawngtlai District-ah 154 awmin, mi 763 tan Police 1 zel, Siaha District-ah 173 awmin, mi 327 tan police 1 awm ang zel an ni. Mizoram Police Department-ah hian Ppost ruak hi 2000 chuang a awm mek a ni, a ti bawk.

Pu Joseph Lalchhuana’n Siaha District MJA te a kawmna-ah hian Police Department atangin,Pu Lalsanglura, SP Lawngtlai District, Pu SD Mishra SP Siaha District, Pu Francis L.Ralte Addl.SP Siaha, Pu C. Lalsangliana SDPO, Chawngte, Pu Beimosia Lapi, DSP (Proby), Pu Albert Lalnunpuia, DSP (Proby) leh Pu N.Vabeiratlua, DIPRO ten an tawiawm a ni.

Attachment

  • Loading attachment...