Nizan khan Chief Minister Pu Lal Thanhawla chuan Mizoram Thalai Kristian Pawl (MTKP) leh Social Welfare Department tangkawp ten Mihringa Sumdawnna leh Ruihhlo thatloh zia inzirtirna programme ‘Education on Human Trafficking and Drug Abuse’ an buatsaih tur khuhhawnna ‘Kick-Off’ programme chu Ignite Studio ah a hmanpui.
Chief Minister Pu Lal Thanhawla chuan mihringa sumdawnna leh ruihhlo hi Mizoram chang nilo khawvel hmun dangah te pawh mite buaipui leh thil ngaihven tak anih thusawiin heng thil tha lo te hi Mizoram ah chuan Sawrkar tan mal do chi a ni lova, Sawrkar, Kohhran leh tlawmngai pawlte tang ruala, mipuite hemi chungchang zirtir a, a dona kawnga theihtawp chhuah tlan a, uar tak nasa leh zawk kan do tlan a ngai a ni, a ti. Mihringa sumdawna chu Mizoramin a hriat a la rei lo thusawiin, phai lama thalai hnathawk tura la thin te laka kan fimkhur a ngai hle a, MYC in phai lamah hnathawk tur a buaipui hnuin hetiang lamah inbumchhuahna hi an kiam tawh a, mahse kan la fimkhur zel a ngai a ni, a ti.
Pu Lal Thanhawla chuan Ringtu za a za inti leh Pathian hnam thlan inti te hnam hrisel ber leh thianghlim ber kan ni tur anih laiin cancer kan nghah dan te leh HIV/AIDS veite kan tam zia enin kan in enchain leh kan in bichian a tul hle a, Ringtu zawn atang phei chuan hei hi thil pawi tak a ni mai lova, thil zahthlak anga kan lak dawn phei chuan a zahthlak hle a ni, a ti.
Mizoram chu Golden Triangle bulah kan awm avangte, ram dang pahnih in min karcheh vangte leh kan state a ralmuan em avangtein hei hi remchanga la in ruihhlo tawlhruk nan misual ten an hmang nasa a, Police, Excise leh YMA ten hengte dona kawnga thawhhona tha tak neiin ruihhlo tam tham tak an man chungin pawhin an man sen lo a lut reng a, hei hi do turin Mizo mipuite hi kan tan ho leh kan thawhho a ngai a ni, a ti a. Ruihhlo avangin thalai nun chu harsatna in a tlakbuak a, hei hian nu leh pate leh khawtlang tan harsatna a siamsak a, tichuan rampumin harsatna kan tawk a chuvangin ruihhlo hi kan ngaimawh leh zuala nasal eh zawka ka do tlan a pawimawh a ni, a ti.
MKTP in hemi chungchang zirtirna chu Mizoram pum tuama an buatsaih tum chu lawmawm a tih thusawiin an hma lakna hi a ram hmangaihthlak a ni, a ti.
Kick off programme hi Rev. Lianchhunga Khiangte, Organiser, MTKP chuan kaihruaiin Rev. Dr. K. Lalrinthanga, Executive Secretary, Baptist Church of Mizoram (BCM), Aizawl Area chuan Devotion hun a hmang a. Hemi hnu hian Human Trafficking chungchanga Talk Show chu neih zui nghal a ni.
Education on Human Trafficking and Drug Abuse hnuaia hian MTKP in hmalakna 5 neih an tum a, chungte Talk Show, Quiz, Training of Trainers, Mini Video clip leh Poster campaign te an ni.
