Nimin Dt 29.9.2016 khan Hrangturzo Bialtu MLA Pi Vanlalawmpuii Chawngthu, Mizoram Women Commission Chairman ni bawk hmalakna in a bial chhung khua N. Mualcheng a lei tlahniam thin chu Geology and Mining Department atangin mithiam Senior Geologist Pu P. Sanghnuna'n a enfiah.

Pu P. Sanghnuna chuan Mizoram leilung awmdan thlalak atanga a lan danin Sailulak khua vel atanga intanin hmar thlang hawiin N. Mualcheng kiang Artahkawn zawn ah, chuta tangin Chekkawn, Keitum kawnah chhuk thla zelin Mamit District thlengin leihnuai khi chat (Confirmed Fault) a awm a. Tlang dung inkhawh dan atang pawh hian hei hi hriat thiam theih takin a chat thla zel a ni. Hei vang hian leimin leh lei tlahniam pawh heng lai hnaih ramah hi chuan a tam phahin a rinawm, a ti. N. Mualcheng khawchhung lei tlahniam chu uluk taka a en hnuah a tul anga mithiam dangte rawn chung zelin District Disaster Management Authority hnena report la thehluh tur a nih thu a sawi bawk.

Nimina N. Mualcheng lei tlahniam enfiahna hi Lungdar BDO Pi Laltleipuii, Zonal Officer, District Disaster Managment Authority ni bawk leh Pu K. Saitluanga, Serchhip District Information and Public Relations Officer ten an telpui a, MLA Pi Vanlalawmpuii Chawngthu hi tel tura beisei a nih laiin engemaw harsatna avangin a tel hman lo thut a, vawiin hian N. Mualcheng hi a pan zawk dawn a ni. Tin, naktukah Faina Hapta hawnna inkhawm N. Vanlaiphai ah a hman pui beisei a ni bawk.

 N. Mualcheng VCP Pu Vanlalpianthanga chuan bialtu MLA hmalaknaa Senior Geologist ngeiin an khaw chhung lei tla hniam an enfiah chu thlamuan thlak a tih thu a sawi a, sawrkar in chak taka hma an laksak ngei a beisei thu leh khawtlang pawhin tha thawh a ngaihna a pianga lo inpek zel an inhuam thu a sawi. Pu Vanlalpianthanga chuan he lei tlahniam hi a chet tanna a rei tawha, a chhehvela cheng chhungkaw engemawzat ten an in an rauh san tawh ani, a ti bawk. Lei tlahniam hi a bulthut ah Meter za vela zau niin a chhip lamah Meter 20 vel a ni a, tun ang renga a chet chuan a chhak lawka Champhai Road tan a him loh theih bakah chhungkaw tam tak sawn chhuah an ngai dawn a ni.

N. Mualcheng khua hi Serchhip atanga khawchhak lam km 45 vela hla, E. Lungdar thlen hmaa awm a ni a, chhungkaw 300 vel leh mihring 1600 vel chenna khua niin an khaw ram lui, Varhva luia nungchate an humhalh that avanga mite hriat hlawh thin tak khua a ni.