Saidan, Kolasib a Kum 2005 a VC in ram an theh sak chhungkaw 42 te hnenah tukin khan House Pass Pu PC Zoram Sangliana, bialtu MLA chuan Saidan Community Hall-ah a hlan.

Pu PC Zoram Sangliana chuan kum sawm dawn ram neitu nihna neilo a awm chhungkaw 42 te ram neitu nihna an nei thei ta chu lawmawm a tih thu sawiin, House Pass te dan anga LSC a siam a nih theih nan bawhzui turin chhungkaw 42 te a chah a ni.

Thusawitu dang Pu Lalnunfela Chawngthu, ASO-II, Kolasib chuan ram neitu nih mai duhtawk lova ram neitu nihna in a ken tel mawhphurhna, chhiah pek te ngaihthah lo turin a chah a ni.

Heng chhungkaw 42 hnenah hian kum 2005 khan VC ten ram hi an thehsak a, mahse House Pass hi tihfel mai a nilo a. Kum 2010-ah ram hi tehfel niin, House Pass nei tura hmalakna erawh a hlawhtling maithei lova. Kumin May 26 khan Kolasib ASO-II Pu Lalnunfela Chawngthu hnenah hmalak pui tura thlen thar a ni a, a nin Director hnenah Approval tura lehkha siamin, Saidan tuithaveng VC ten Land Revenue & Settlement Directorate-ah an thehlut a. A tul angin hmalak zel niin, Bialtu MLA hovin VC te leh mi thahnemngaiten theihtawp chhuahin an bawhzui zel a. 5 July, 2016 khan sorkar atangin approval chhuakin, vawiin hian sem theihin a awm ta a ni.