Vawiin chawhma khan Parliamentary Secretary Pu Joseph Lalhimpuia hovin SSA leh RMSA, Aizawl District-te chuan District Education Committee (DEC) Joint Meeting, Aizawl DC Office Chamber-ah an nei a, meeting hi Pu Lalchungnunga, Addl DC, Aizawl-in a kaihruai a ni.

Pu Joseph Lalhimpuia chuan Mizoramah Zirna hmasawnna kawnga langtlang taka hmalakna a awm theih nan leh Education-a thawkte inkara thawhhona tha leh chak zawk a awm theih nan hma lak mek a nih thu a sawi. Parliamentary Secretary hian IT department nena tang kawpa school mapping neih mek a nih thu te, Mizoram-a zirna hmasawn zel nan school drop out rate ti tlem tura nasa zawka hmalak a pawimawh thu te, Literacy Campaign nei tura hmalak mek a nih thu te, Physical Wing tihchak tum a nih thu te, faina leh thianghlimna kawnga hmasawnna a awm theih nan Cleanliness Movement sikul atanga tan tum mek a nih thu te meeting-ah hian a sawi a ni.

Meeting-ah hian an hmalakna hrang hrang ngaihthlak a nih bakah ruahmanna an neihte thlirho a ni a, hmalakna tura ruahmanna hrang hrang chhawpchhuah te hi lungrual taka pawm a ni.

Meeting-ah hian Pu B.Lianthlira, DPC, RMSA, Aizawl District chuan kum 2009-2010 atanga 2013-2014 chhunga hmalakna hrang hrang Action Taken Report a pe a, ruahmanna duan Plan of Action 2014-2015 proposal a pharh chu thlirho niin pawm a ni. RMSA, Aizawl District hian kum 2014-2015 atan Budget approved Rs. 609.25 lakhs an nei a, heng sumte hi naupang zirna tih hmasawn nan tangkai taka kawng hrang hranga hman tum dan an sawiho bawk.

RMSA, Aizawl District hnuaiah hian Govt. High School 62, RMSA Secondary School 16, Aided High School 36, Central High School 1 leh Private High School 79 an awm mek.

Pi Zoliani Hnamte, DPC, Aizawl District, SSA Mission pawhin 2013-2014 a hmalakna hrang hrang Action Taken Report pein, 2014-2015 atana Aizawl District SSA Mission Budget a pharh a, Plan of Action-te hi District Education Committee, Aizawl District chuan a pawm a ni. Kum 2014-2015 chhunga SSA Aizawl District atana Fund approved zat chu Rs.2616.17 lakhs a ni a, Fund hmuh tawh zat Rs 362.07 lakhs atangin Rs 347.02 lakhs hman ral a ni.

Aizawl District SSA hnuaiah hian Primary School 282 leh Middle School 232 awmin, zirlai naupang Primary School-ah 13647 leh Middle School-ah 13154 an awm a ni.