Kar khat awh Inter-Departmental Sports Meet vawi 27-na chu vawiin tlai khan Govt. Mizo Higher Secondary School Hall ah khar a ni a. Sports & Youth Services Secretary Pu Zothankhuma’n kharna inkhawm hi a hmanpui a ni.
Mizoram Civil Services Sports & Cultural Association (MCSS&CA) buatsaih Mizoram sorkar hnuaia department hrang hrang te inelna Inter-Departmental Sports hi kum tin neih thin niin kuminah indoor games chi hrang hrang 4 -carrom, chess, badminton leh table tennis ah inel a ni a. Badminton hi Govt.Mizo High School Hall-ah, Carrom hi Ramhlun Indoor Stadium-ah, Chess hi MPRO Hall Shivaji Tilla-ah, Table Tennis hi Kulikawn Indoor Stadium ah khelh a ni. Badminton-ah hian department 20 an tel a, Table Tennis ah department 16, Chess ah department 15, Carrom ah department 19 an tel a. Heng inelna hrang hranga lawmman latute hnenah hian certificate bakah Gold medal - 69, Silver medal -65, Bronze medal - 65, a vaiin medal 199 sem chhuah a ni a. A pumpuia champion department hnenah Trophy hlan a ni.
Inter-Departmental Sports Meet 2014 a department champion chu Mizoram Police an ni a. School Education Department chu pahnihna niin Environment & Forests leh Printing & Stationery te chu pathumna an ni.
Kharna inkhawm hi Organising Committee Vice Chairman Pu K.Lalrintluanga’n a kaihruai a, Organising Committee Secretary Pu Rosangliana’n he sports neih zawh tak chungchanga hriattur pawimawh te a tarlang a. MCSS&CA General Secretary Pu Lalrammawia chuan lawmthu sawiin hun hnung a khar a ni.
