Parliamentary Secretary Pu T.T. Zothansanga chuan nimin (21st August 2014) khan Tourism Minister Pu John Rotluangliana aiawhin National Conference of State Tourism Ministers, New Delhi-a neihah a tel.

He Conference-ah hian Pu T.T. Zothansanga chuan Mizoram Tourism hmasawnna atan inkalpawhna tha a pawimawh thu a sawi a. Central Sponsored Scheme guideline siamtha a, sum tam zawk state hman theih tura a lo kal theih nana ruahmanna siamsak tura ngenin, India hmarchhakah chuan hnathawh kalphung a dan avangin project thawh zawhnan hun rei zawk ruahman ni se, a ti a. Protected Area Permit (PAP) hian pawnlam lan danah hmun hlauhawm anga Mizoram a tarlan avangin siamrem a ngaih thu Parliamentary Secretary hian a sawi bawk a ni.

National Conference of State Tourism Ministers hi Union Finance Minister Pu Arun Jaitley leh Union Tourism Minister Shripad Naik ten an hmanpui a. India ramchhunga Tourism industry in a thiltawn pawimawh tak tak te sawiho niin, harsatna te leh tourism lama rampum hmasawn theih dan turte an sawi a ni.