Vawiin chawhhnu dar 3:00 khan Serchhip District NYK District Advisory Committee chu District Bawrhsap leh Chairman, District Advisory Committee on Youth Programme, Nehru Yuva Kendra ni bawk Juhi Mukherjee IAS hovin ama pisaah an thukhawm a, kum 2014-2015 chhunga NYK Serchhip District-in a hmachhawp programme hrang hrang leh chumi atana sum hman tur ruahman te an thlir hova, heng ruahhmanna te hi pawm niin, kumin sawrkar kum kal meka an sum hman tur ruamhman zat chu Rs. 4,03,000/- a ni.

He meeting-ah hian nikum chhunga NYK-in Serchhip thalai te tana hna a thawh tawh te thlir let a ni bawk a, Serchhip chu district thawk tha ber pawl a nih thu leh chumi avanga programme pawh neih belh zel an nih thu te, thalai tam zawkin NYK an hmelhriata an hman tangkai lehzual theih nan media lama tan lak a tul thu te sawi a ni bawk.

NYK hnuaiah hian thalaite chakna, thiamna leh theihna te tihhmasawn nan, programme hrang hrang tam tak siam a ni a, tin hmeichhiate dinhmun chawikan nan leh retheihna umbo nana eizawna kawng inkawhhmuhna te, chumi atana inzirtirna thlengin a awm a, heng programme hrang hrangte hi Youth Club (YMA/MHIP/Cultural Club etc.) hmingin engtik lai pawhin a dil theih reng a ni.