Nithum chhung awh tur Lunglei-ah a vawikhatna ni bawk Food Festival chu vawiin chawhnu dar 1:00 khan Lunglei Children Park ah Parliamentary Secretary Pu Joseph Lalhimpuia'n a hawng.

Food Festival hawnna inkhawm Pi R.Lalrodingi, Joint Director Industries Department kaihruaiah PuJoseph Lalhimpuia chuan thu sawiin, National Mission of Food Processing chuan kum 2012-2017 thleng atan Mizoramin Food Processing lama hmasawnna kan neih theih nan cheng vaibelchhe 11.31 min pe a ni a ti a, Mizoramah Enterprenuership te hian National Mission of Food Processing kalphung leh a Policy a neih dan te kan la hriatchian tawk loh avangin a tangkai tur ang leh kan hlawkpui tur angin kan la chhawr theilo a, chuvangin mahni awmna hmuna dawr siam mai duhtawk lovin hmasawnna nasa zawk nei thei turin department leh mimal te pawhin tan lak leh hriat zau kan tum a pawimawh ani a ti. Kan tharchhuah thlai leh theirah chi hrang hrang te a hun laia tam tak awm thin, a hnua vang leh em em thin te hi dah that dan, leh tuihnai zawka siam danglam dan kan ngaihtuah zel a tul tawh a ni tiin, sawrkar duhsak tlak leh duhsak phu a tih tak takna nen hmasawn turin tan i la ang u a ti bawk. Pu Joseph Lalhimpuia hian Mizo ten tui kan tih zawng chauh nilo kan taksa tana tha leh hrisel ei nachang kan hriat zel a pawimawh a, ei leh in thianghlim zawk leh hrisel zawka sawngbawl kawngah hmasawn turin tan la ila, midangin an tihsa ringawtah innghat lovin mahni in tih theih ve kan tum a pawimawh a ni a ti. Lunglei-ah Teachers Guest House sakna tur Cheng nuai 120 Planning Department-in an passed tawh thu leh Lunglei-ah Foreign Language zirna din tura ruahmanna kalpui mek a nih thu a sawi bawk.

Vawiin atan Lungleia Food fest ah hian dawr 30 ten an thil siam te an pholang a, heng zinga 19 te hi Lunglei tualchhung ami te an ni a, Aizawl atangin 9, Champhai leh Mamit atangin dawr 1 ve ve an inpho bawk a ni. Vawiina a hawnna hunah hian Lunglei Bawrhsap Pu Asish Madharao More, IAS, pawhin thusawi in Food Mission in a Food Fest a rawn buatsaih hi kan vanei hle a ni. Food hi kan chaw rinpui ber a ni a Lo neitu te thlai thar chhuah te hi tha tak leh hrisel zawk leh hlawk zawk a hralh theih a sawngbawl hi a pawi mawh hle a ni a ti. Lo neitute thlai thar chhuah hi hlutna chang hria a uar zel turin kalkhawm te a chah a ni.

Pi Arti Lal, Industries Director leh Mission Director ni bawk pawhin thusawiin he Food Fest hi Ministry of Food Processing Government of India bultum a ni a, a tum ber chu kan thlai thar chhuah a tanga chaw tui hnai leh hrisel siam chhuah a Lo neitu te leh Enterpreneur ten hlawk zawk a sum an lak luh theih nana tih a ni a ti.