Cheng nuai 7, Sing 9, Sang 9 senga sak BNRGSK Building Ralvawng a mi chu vawiin chawhma dar 11:00  khan Lunglei District High Powered Committee Vice Chairman Pu JosephLalhimpuia\'n a hawng.

Hawnna inkhawm Ralvawng VCP Pu Malsawma kaihhruai-ah thu sawiin, HPC Vice Chairman chuan, BNRGSK  Building tha tak Ralvawng ah hawn theih a ni ta chu lawmawm a tih thu sawiin, a khaw neitu mipuite pawhin lawmna chang an hriat a, tangkai taka an hman ngei a beisei thu leh Building sak a nih theihna tura hmalatu Department a thawktute thahnemngaihna a fak bawk. Mizoram sawrkar chuan Ropuiliani Park siam tumin ruahmanna a siam thu leh hemi atan hian NEC ah cheng nuai 350 dil mek a nih thu a sawi a, Mizoram sawrkar hmalakna pawimawh tak NLUP chu mipuite tan a nih ang takin a dawngtute pawhin an thawhchhuah zawng zawng an ta tur a ni tih hria se, sawrkar kan bum emaw kan tih hian keimahni zawk kan in bum a ni tih hria a, NLUP chu hlawhtlin pui ngei tura  rinawmna leh thawhrimna kan neih a tul a ni a ti. Kum 10 kalta chhung khan Mizoram ah rorelna dik leh fel a awm loh avangin Kohhran hote nasa takin an tawngtai a, tuna Chief Minister Pu Lal Thanhawla leh a kaihhruai MLA te hi a fel ber nilo mah ila hlemhletna leh duhsak bik nei a kan kal a rem ve lo a, Kohhran hote pawhin rinawmna leh dikna nena kan kal zel theih nan  tawngtaipui zel turin a sawm a ni HPC Vice Chairman chuan a ti bawk.

He hunah hian Pu Lalhmachhuana BDO  Lunglei  pawhin thu sawiin Lunglei District ah BNRGSK Building 18 sak tawh a nih thu sawiin tun tuma hawn tak Ralvawng a mi hi Batch hmasa ber group a ni  a, mumal taka hawn hmasak ber a ni bawk tiin, NREGS office atan bakah mipuite rorelna tur leh NLUP Office atan hman tur a ni a, a chhunga bungraw mamawh tur pawh sawrkarin a pe nghal vek a ni a ti bawk, IWMP hnuaiah Ralvawng-ah cheng nuai 6 sengin Godown sak tum a nih thu a sawi bawk.

Vawiin a BNRGSK Building hawn a nih rual hian HPC  Vice Chairman ruahmanna in Ralvawng mipuite tan a thlawna in entirna hun buatsaih nghal a ni a, Civil Hospital Lunglei Doctor leh thawktu dang ten damlo thahnem tak enin damdawi pawh a thlawnin an sem nghal a ni. Ralvawnga Building hawnna hun hman zawh a nih hnu hian Pu Joseph Lalhimpuia  hian a bialchhung Dawn khua tlawh nghalin, Mual laih hna thawh mek leh BNRGSK Building sak mekte a tlawh nghala khawtlang hruaitute nen khawtlang mamawh chi hrang hrang an sawiho nghal bawk.