Chief Minister’s Rural Housing Scheme (CMRHS) atanga insak  tanpuina Lunglei East bial chhunga dawngtura thlante hnenah vawiin khan Lunglei East A/C Bialtu MLA, Mizoram Youth Commission Chairman Pu Joseph Lalhimpuia’n Dawn khua BNRGSK Hall ah a sem. 

Khuallian Pu Joseph Lalhimpuia chuan sawrkarin mi retheite chawikan leh chhawmdawl a ngaih pawimawh avangin thingtlang mite puala insak tanpuina scheme chu duan a ni tiin Mizoram Chief Minister zahawm tak Pu Lal Thanhawla’n a sawi lawk tawh ang ngeia a taka he hmalakna kalpui a ni ta chu lawmawm a tih thu a sawi a. CMRHS chu khawpuiah pawh dawng chak tak tak, scheme in a huap si loh an awm laia dawng thei tur zinga an tel chu an vannei hle a, a hmanna tur dik taka hmanga, in leh lo phuisui tak din turin a a chah a ni.Mizoram Youth Commission  hmalakna sawiin MYC Chairman chuan thalaite hmasawn nan  theihtawp chhuah a hma lak mek a ni a, tun hnaia sipai lak tur atan pawh mizo thalaite a tam thei ang ber lak an nih theihna turin MYC kaltlangin inzir lawkna buatsaih a ni dawn a ni, a ti a.  SSC coaching pawh MYC atangin kalpui mek a nih thu leh tun thla ni 21 atangin Aizawl leh Lungleiah IAS coaching tan tura hmalak a nih tur thu sawiin Mizo thalai a tam thei ang ber IAS nih tir tuma tan an lak thu Pu Joseph Lalhimpuia hian a sawi bawk. 

Semna inkhawm hi Lunglei BDO Pu Victor Lalawmpuia’n a kaihruai a. Vawiin a Chief Minister Rural Housing Scheme dawngtute hi Dawn khua atangin chhungkaw panga (5), Ralvawng atangin chhungkaw panga (5) leh Hlumte atangin chhungkaw pahnih (2) te an ni. Beneficiary tin ten in sak nan Rs. 50,000/- theuh an dawng dawn a. Hei hi installment vawi thuma pek chhuah tur niin Lunglei District-ah beneficiary chhungkaw 619 thlanchhuah an ni ang. He Scheme hi thingtlang khua a chengte tana duan a nih angin Lunglei District chhunga Lunglei Town, Hnahthial Town leh Tlabung Town area a chhungkaw chengte a huam tel lo ang. 

CMRHS hi New Economic Development Policy(NEDP)  hnuaia hmalakna a ni a; thingtlanga cheng, khawsak harsa  zual, mahni thawhchhuah atanga chenna in  sakna tur leh thawm thatna tur sum neizo lo te tan bik a duan a ni. He scheme kalpui tur hian Rural Development Department chu Nodal Department  a ni a; He Scheme hnuaia tanpuina dawngtute thlangchhuak turin District Bawrhsapte kaihhruaina hnuaia District Level Selection Committee a awm a; tin, he sum hmandan hi kumtin endik a ni dawn a ni.