School Education Department changtu Parliamentary Pu Joseph Lalhimpuia chuan, zirlaite chu khawi hmun ah pawh Mizo Hnam zia vawng himtu ni turin a chah.

He thu hi Nimina Gov't Leitlangpui HSS Lunglei in Cultural Fest leh Advance Christmas a hmanpuina ah sawiin Pu Joseph Lalhimpuia chuan pi leh pu te atanga rohlu kan neih aia upa zahna, tlawmngaihna, rinawmna leh taimak te chu hnam dangte in a Mizote min ngaihsanna leh hriatna a nih angin zirlaite chu khawi hmunah pawh awm se Mizo hnam zia vawng himtu leh chawi sangtu ni zel turin a sawm a ni. Pu Joseph Lalhimpuia chuan Leitlang HSS zirlaite chu an nungchang leh zirnaah midangte entawn tlak ni turin a chah a, thingtlang atanga lehkha zir kan ni emaw khawpui atanga zir pawh ni ila mahni awmna hmun theuhah mite entawn tlak nih tum theuh turin a chah a ni. Khuallian Pu Joseph Lalhimpuia chuan Gov't Leitlangpui HSS chu kum 2016-2017 Financial Year chhung ngeiin, an sikul classroom zauhbelhna atan School Education Department atangin cheng nuai 20 pek an nih tur thu leh Classroom tina dah turin Green Board pek an nih tur thu a sawi a ni.

Nimina Gov't Leitlangpui HSS Lunglei ten Cultural Fest leh Advance Christmas an hmanna hi Pu T.Lalhlimpuia, Lecturer in kaihhruaiin, zirlaiten Mizo hnam ziarang lang thei chi ; Hnam lam leh zai te bakah thuchham hmangte in hun an hmang a, Khualllian hi Lunglei District-a School Education Department hotuten an tawimawm a ni.

Parliamenatary Secretary hian Lunglei DEO Office bula Education Complex cheng nuai 100 senga sak mek chu tlawhin hna kalpui mek dan a enfiah nghal a. Education Complex hi Mizo pa chhiara chhawng thum tur niin, zirtirtute chawlh hahdamna leh riah theihna tura ruahman a ni a, a hna thawktu Lushai Engineering te chuan nakum April thla hian zawhfel hman an in beisei a ni.