Vawiin khan YMA Branch, Ramthar Veng, Lunglei chuan an Veng YMA Hall-ah YMA Day an hmang a, he hun hi Parliamentary Secretary Pu Joseph Lalhimpuia chuan hmanpuiin, YMA Run sakna atan MLA Fund atangin cheng 50,000/- a hlan nghal a ni. 

Pu Joseph Lalhimpuia  chuan Mizote tana Pathianin YMA min pe hi a vanneihthlak in, hnam inpumkhatna thlentu, mi chanhaite tana belh tlak pawl a ni, a ti a. Young Lushai Association June Ni 15, 1935-a din a nih hma kum khatah khan Lunglei khawpuiah sap missionary-te phurpuinain Young Lungleh Association chu din a lo nih tawh thu sawiin, hetih lai hian YMA anga Lungleia a din tan chu kum 1970 chho atang chauh khan a ni a, tunah hian puitlin lam a pan ve mek a ni, a ti. Mahni hlawkna ngaihtuah lova midangte tana inpekna chu rawngbawlna ropui berah a ngaih thu sawiin, hetiang taka thawk thin YMA hlutna hi hun inher zelin a tidanglam dawn lova, a hlutna a ti zual tulh tulh zawk a ni, a ti bawk. 

Ramthar Branch YMA te hian kuminah an Veng chhunga zirlai tithe te chawimawina hun an hmang nghal a. YMA member mi 1588 awm in, Lunglei khawpui chhunga YMA Branch lian ber pawl an ni mek a ni.  

He YMA Day hmanna hi YMA Sub Hqrs. Lunglei atangin Asst. Secy Pu R. Lalnghakliana leh SEC member te’n an hmanpui a ni.