Tukin khan Parliamentary Secretary Pu Joseph Lalhimpuia, Lunglei East bialtu MLA chuan a bial chhung Zobawka leimin avanga chhiatna thleng chu a hmunah a tlawh.
Zobawk Field chhak kopang min avangin chhungkaw 4-te in luah chu, luah zui tlak lovin an bungrua te thiar chhuah a ni a. Pu Joseph Lalhimpuia chuan chhiat tawk te chu a tawrhpui thu sawiin, an in leh lo din thar dan turin sawrkar atanga tanpuina awm thei ang te ngaihtuahpui a tum thu a sawi a ni. Chhiat tawk chhungkua te hnenah hian tun maia an mamawh zualpui phuhrukna atan cheng 10,000/- theuh a hlan nghal a ni.
Hemi hnu hian Zobawk khawchhung hmundanga tunhnaia ruahsur nasa in a tihchhiat te a tlawh kual nghal a, a tul anga sawrkar hotute nen lo indawr turin khawtlang hruaitute a chah a. Parliamentary Secretary pawhin theihtawpa lo bawhzui sak a tum thu a hrilh nghal bawk a ni. Zobawk khawtlang hruaitute hnenah hian a tul anga hman turin silpaulin bundle 2 a pe bawk a ni.
Pu Joseph Lalhimpuia hian Zobawk a tlawh zawh hian Lunglei South Constituency chhunga Salem Venga Pi Sangdawngi in thiah ngai khawpa ruah leh thliin a tihchhiat thiata hnatlang mek Salem Veng YMA-te thingpui in na atan cheng 2,000 a hlan nghal bawk a ni.
