Vawiin khan Chief Minister Pu Lal Thanhawla hovin Council of Ministers chuan Cabinet Meeting neiin Chief Secretary Pisaa Conference Room ah an thukhawm. Vawiin Cabinet meeting ah hian kar hmasaa Council of Ministers thutkhawmna neih a Agenda an ngaihtuah hman lo te 6 te chhawpchhuah niin hengte hi ngaihtuah a ni.

Agenda chhawpchhuah zinga The Mizoram (Election to Sinlung Hills Development Councils) Rules, 2017 chu siamthat ngai laite siamthat hnuin chhawpchhuah nise an ti a; HUDCO loan atana Mara Autonomous District Council hnenah Government Guarantee Deed pek te;  The Mizoram Village (Sanitation) Rules, 2017 te; Sub-Committee on Medical Reimbursement Report te leh Draft Mizoram Building and Other Construction Workers (Regulation of Employment and Conditions of Service) (Amendment) Rules, 2017 te chu an pawm a. Heng bakah hian Additional Agenda-a Department 5 hmingthlakna tur pawh an pawm bawk a ni.

Cabinet-a thu chhawpchhuah an ngaihtuah hmain tun Pathian Ni leh Thawhtan Ni a ruahsur avanga Mizoram dung leh vanga chhiatna hrang hrang thleng leh hemi avanga nunna chan an awm chu rapthlak leh vanduaithlak tiin chhiat tawk te an tawrhpui thu an sawi a. Nunna chan ta te an sun nan ngawi reng minute khat an ding a. Thawhtan Ni, June ni 12 a Union Home Minister leh Myanmar ramri dep State Chief Minister te meeting pawimawh tak Aizawl a neih chu lawmawm tiin he thil hi cabinet meeting ah hian chhinchhiah a ni bawk.

Cabinet meeting zawh hian Chief Minister hian New Secretariat Conference Room-ah chanchinbu mite kawmin Press Conference a nei nghal a, tunhnaia ruahsur nasat vanga in lo leh chan te, chhiatna hrang hrang a awmte leh nunna chan an awm chu a rapthlak tiin an mahni chawmdawl nan sawrkar chuan theihtawp a chhuah mek a, mahse khua a chhiat reng avangin duh angin hma lakna a chak thei lo chu pawi a tih thu a sawi a. Nunna chant e leh chhiat tawk hrang hrang te chu a tawrhpui tih sawiin chhiatna thleng chanchin zawng zawng chhipchhiar taka khawn leh chhinchhiah a nih theih nan Home Minister kaihhruaina hnuaiah High Level Committee din a nih tur thu a sawi bawk.