Vawiin khan Chief Minister Pu Lal Thanhawla chuan Mizoram State Cooperative Union (MSCU) inkhawmpui Annual General Assembly vawi 30-na Synod Conference Hall-a an buatsaih chu khuallian niin a hmanpui.

Chief Minister Pu Lal Thanhawla chuan Siamtu lo ruahman angin mihringte hi khawsa ho tura siam leh tih kan ni a, Mizo khawtlang nun ngaihtuahin Cooperative Movement hi kan khawsak zia nen a inrem hle a. Khawsa ho a, inpui tawn a, inpei zawn tawn zel thin kan ni te leh kan thufing ‘Sem sem dam dam, ei bil thi thi’ tih te pawh hian cooperative pawimawhna lam a kawk viau niin ka hria a ti a. India ramah cooperative movement bul tanna a rei tawh thu te leh tun hma lamah cooperative movement Mizorama a kalpui dan tha tawk lo leh duhthusam  lo nih thu te sawiin vawiinah chuan hma kan sawn hle tawh a, hun hmasa lam ngaihtuahin a kalpui dan pawh kan thiam tawh niin a lang a ni, a ti.

Cooperative society pawimawhna a sawinaah Chief Minister chuan ram chhung hmun danga Cooperative Housing Society te hi an tangkaipui hle a, Mizorama kan din theih chuan  mipui mimir tam tak, Zokhaw lam mipui thlengin an hlawkpui thei dawn a tiin ngaihtuahna sen tha a tih thu a sawi a. Cooperative movement kuthnathawktuten an hlawkpui leh zawk nan tharchhuah sawngbawlna leh zawrhchhuahna lamah cooperative anga kal in rah tha a chhuah theih thu a sawi a, chutiang zawnga ngaihtuahna seng turin inkhawmpuia tel te a chah a. Mizoramin National Cooperative Development Corporation a hmang tangkai mek tih sawiin a kaltlang hian thil tam zawk leh kuthnathawktute hamthatna atan nasa leh zawka hman tangkai dan kan zawn a ngai a ni, a ti.

Chief Minister chuan privatization leh globalization ten ram thang mek te a chiah mek thu leh mipuite pawh kan in buatsaih a ngai a chutih rualin chimral (assimilation) do let (counter) na tha tak pakhat chu cooperative society te hi an ni ve, a ti a.

Chief Minister chuan sawrkar anga thil tih, hlawhtling thei lote hi cooperative anga kal hian kan hlawhtling thei a ngem em tih ngaihtuahna a neih thu sawiin cooperative movement a tel mek ten tumruhna leh thawhrimna an neih chuan khawvela cooperative lama hlawhtling pawl tak AMUL angin hlawhtlinna a hmuh ngei a beisei tih a sawi bawk.

He hunah hian Pu R. Zarzosanga, IAS, Registrar of Cooperative Societies pawhin thusawina neiin Cooperative Movement pawimawh dan leh a tul chhante a sawi a ni.

Programme hi Pu Lianthangpuia, MSCU President chuan kaihruaiin MSCU din chhan leh hnathawh leh hmalakna an neih tlangpui te a sawi a. Pi Lalnuntluangi Hrahsel, Chief Executive Officer, MSCU chuan an pawl Annual Report tarlangin hun a hmang a. Chawhnu ah programme chhawnghnihna hmangin Annual Report thlirhona te, a pawmpuina te leh kum 2018-19 atana an Budget ruahman lailawk chin te an sawiho a ni.

Mizoram State Cooperative Union hi kum 1975 ah din niin thawktu nghet 24 leh a nghet lo mi 5 an awm mek. MSCU hnuaia cooperative society hrang hrangah sawrkar hian share capital nuai 2500 vel a nei a, heng society hrang hrang katlangin mi 3000 chuangin eizawnna kawng an nei a ni.