Tukin zing dar 7:30 khan Pu Joseph Lalhimpuia, Parliamentary Secretary, School Education Department chuan Rs 23.85 crore senga sak that tur Kendriya Vidyalaya School, Lunglei Ramthar Veng chu a hmunah a tlawh. Parliamentary Secretary hi Pu Zothankhuma, Commissioner, Commerce & Industries Department leh Pi Lalzarmawii, IAS, Deputy Commissioner, Lunglei District, leh Kendriya Vidyalaya School  Chairperson ni bawk ten an tawiawm a ni.

Pu Joseph Lalhimpuia chuan kum reilote chhungin chhim lamah hmasawnna tam tak a thleng chu lawmawm a tih thu sawiin, hemi kawngah sawrkarin theihtawpin tan a la tih kalkhawmte a hrilh a. Zirna kawngah pawh hmasawn lam pan zelin HSLC, HSSLC leh College result tha tak tak neih chhoh a ni tiin, tun aia nasa lehzuala zirna lama tan la zel turin mipuite a fuih a. India ram pum huap pawha zirna in tha berte zinga mi Kendriya Vidyalaya School Lunglei khawpui chhunga alo ding ta chu hmasawnna rahbi lian tham tak a ni, a ti.

Pu Zothankhuma, Commissioner, Commerce & Industries Department pawhin thu sawiin MAMCO kaltlanga Detailed Project Report (DPR) an siam pawm a nih tak avangin Rs 23.85 crore hmanga a rang thei ang bera building sak hna tan a nih tur thu kalkhawmte a hrilh. 

Pi Lalzarmawii, IAS, Deputy Commissioner, Lunglei District leh Kendriya Vidyalaya School Chairperson ni bawk pawhin thu sawiin, Kendriya Vidyalaya School chu Lunglei khawpui tan thil hlu tak leh malsawmna lian tak a ni, a ti a. Zirna kawnga hmasawnna thui tak thlen thei a nih avangin he zirna in tha tak hi hlut hle turin kalhawmte a chah a. School building sak that tur leh a hmunhma buaipui tur thui tak ala awm avangin District Bawrhsap  chuan khawltang hruaitu VC, NGO hrang hrang leh mipuite thawhpuiah a sawm nghal bawk.