Vawiin khan YMA Sub-Hqrs. Lunglei hnuai a Music Committee buatsaihin Lengkhawm leh solfa zai a intihsiakna Saikuti hall Lunglei-ah neih a ni. He inelna ah hian YMA Sub Hqrs. hnuai a Branch 11 an tel a, Pu Joseph Lalhimpuia HPC Vice Chairman chu khuallian niin a hmanpui. Hawnna inkhawm ah Pu P.Lalhmangaihzuala President, YMA Sub Hqrs, Lunglei chuan hawnna thu tawi sawiin YMA Sub Hqrs. Lunglei Music Committee ten hetiang inelna an buatsaih thei chu lawmawm a tih thu sawiin he inelnaa lawmmam la ve lo te pawhin a hlawkna in tel der tawh a ni tiin Branch hrang hrang te inpawh tlanna leh inlungrualna tha zawk an neih theih phah a beisei thu a sawi a ni.

Khuallian Pu Joseph Lalhimpuia chuan hla hmanga inelna thianghlim YMA ten an buatsaih chu lawmawm a tih thu a sawi a, hla hi harsat lai, mangan lai emaw lawm lai leh hlim lai a kan ngaihtuahna sawi chhuahna tangkai tak a nih ang in, hla hlui te pawh a hlu zual zel a, thangthar ten hla lam ah inthlahdah lova hla hluite vawng nung zel tura tan kan lak a ngai a ni ati.

Inelna ah hian Solfa leh Lenkhawm zai ah hla hnih ve ve ruat a ni a, Solfa ah 'Kawrnu' - Chhuana phuah leh 'Kan tlang ram par vulna' - Liandala phuahte hman a ni a. Lenkhawm zaiah 'Pialral ka ngai ka Lal lenna' - Rev. Kappua phuah leh 'Hun leh kumte an ral zel- Rev. Bawla phuah te hmangin inelna neih a ni. Solfa leh Lenkhawm zai ah hla pakhat ve ve pawt fuh in inelna ah hian sak a ni a.

Solfa leh Lengkhawm zai ah lawmman 1na atang a 3na siam niin Lengkhawm zai ah 1st-Lunglawn, 2nd-Venglai, 3rd-Electric Branch te an ni a, Solfa ah 1st-Bazar veng, 2nd-Chanmari leh 3rd- Rahsiveng Branch te an ni. Lawmman dang Conductor thiam, khuangpu thiam leh hla hril thiam te siam a ni bawk.