Transport Minister Pu P.C. Zoramsangliana chuan nimin khan Kolasib khaw chhunga Department head zawng zawngte chu DC Conference Hall-ah ko khawmin an hna chanpual theuh an thawh kawngah District chhung ti hmasawn tura nasa lehzuala ke pen turin a chah.

Pu P.C. Zoram Sangliana chuan Department hotute chu an thiamna avanga an hna theuh thawk an nih thu sawiin lungrual taka hna an thawh thinna chu fakawm a tih thu a sawi a. Sawrkar flagship programme NLUP kalpui danah te leh phai lam mikhual dawnsawn kawngah te in thawk tha hle a ni, a ti.

DC Pi Niharika Rai chuan District chhunga an hnathawh dan kalphung sawiin bialtu Minister hova department hotute meeting chu a tum thumna atana an neih theih avanga a lawmthu a sawi a. Hemi hnu hian Department mimal tinten an hna kalphung sawiin harsatna an neihte an sawi chhuak a. Chung an harsatnate chu a theih ang anga lo bawhzui sak Minister hian a tum a ni.

Kolasib-a Circuit House sak zawh tawh, a cheina tur sum awmloh avanga hman theih la nilo DC in Minister hnena a thlen leh Department tam zawkin staff indaihlohna leh Motor mamawhna an sawite, Kolasib chawmtu Power transformer chak zawk dah a ngaih thu te chu harsatna sawi langsar zual te an ni a. Minister chuan District chhunga kawtchhuah pawimawh tak zinmite leh Lo lam fehten an paltlang thin Zero Point-ah chawlhbuk tha tak sak nise tiin he hunah hian a sawi a. Kolasib khaw chhim leh hmar lama By-Pass road kaltir dan tur Plan lo siam turin PWD hotu a hriattir bawk a ni.