Vawiin khan NLUP Implementing Board Vice Chairman Pu P.L.Thanga hovin a office chamber ah RKVY Stream II hnuaia Central sorkar-in grant vaibelchhe 39.89 a rawn pek hmanga NLUP hna thawh dan tur sawi ho a ni a. District hrang hranga NLUP hnuaia hmalakna hmun te ngaihtuah chungin loneitu tam berin an hman tlan theih tur kawng pawimawh siamna tur hmun te rel ho a ni.

Tarlan tawh thin angin Rashtriya Krishi Vikas Yojana(RKVY) hnuaia Agriculture leh a kaihhnawih hna peng hrang hrang thawh nan Mizoram sorkar-in kumin a a sum hmuh tur hi vaibelchhe 159.54 a ni a. Mizoram sorkar Annual Plan sum ruahmanah NLUP hnuaia Agriculture & Allied sector hna thawh na tur sum a pun tak avangin Mizoram sorkar chu RKVY stream II dawng thei state zingah telin vaibelchhe 39.89 a dawn turah Ist installment vaibelchhe19.94 chu central sorkar hian a sanction tawh nghe nghe a. Vawiin a RKVY sum hman dan tur rel ho na ah hian a nodal department Agriculture Director leh officer te bakah Rural Development hotute an tel a ni.