Vawiin chawhnu dar 1.00 khan Mizoram Bharat Scouts & Guides Association chuan an Vice-President leh Chief Secretary ni bawk Pu Vanhela Pachuau chu pension-a a chhuah dawn tak avangin Chief Secretary’s Conference Hall, New Secretariat Complex-ah thlahna hun an hmang.

Vice President Pu Vanhela Pachuau thlahna inkhawm hi State Chief Commissioner Pu Zoliana Royte chuan a kaihruai a; Dr. Varparhi Khiangte, Vice President, Mizoram Bharat Scouts & Guides chuan ngaihhruaihna thilpek a hlan a ni. Pu Zoliana Royte chuan Pu Vanhela Pachuau chu Scouts & Guides-in Mizoram-a hma a sawn theihna tura a theihna kawng apianga kawng sialsaktu a nih thu sawiin, a tanpuina leh kaihhruaina azarah Mizoram Bharat Scouts & Guides chuan Mizoram chhung leh pawn lamah activities tam tak a tihpuitlin theih thu a sawi lang.

Pu Vanhela Pachuau pawhin thuchah tawi sawiin, “Mizoram-ah kan khawtlang nun chu nasa takin suahsualna chi hrang hrangin a tlakbuak mek a; kan ram mipuite hian kan rilru puthmang leh kan thlarau nun lamah nasa taka tan kan lak a ngai tih a chiang hle a. Chutiang karah chuan Mizoram Bharat Scouts & Guides hi zirlai naupangte leh mipui mimirte khalh ngil theitu tur pawl pawimawh tak kan ni” a ti. Pu Vanhela Pachuau chuan, “Khua leh tuite zinga ngaihtuahna seng tak tak peihte leh mi inpezo tlemte te hian ram hi an siamtha thei tih hi rinhlelh tur a ni lova; ram siamthatna hi chutiang mite avanga lo thleng thin a ni chauh zawk tiin Magaret Mead, American anthropologist chuan a lo sawi thin a. Mizoram-ah pawh mipui nawlpui hi chu an nun thlak thlengtir turin kan beisei ngamlo a nih pawhin, Pathian chakna ringin nasa takin kan insiamtha thei a ni” a ti.

Vawiina Vice President Pu Vanhela Pachuau thlahna inkhawmah hian Mizoram Bharat Scouts & Guides Association hruaitute an tel kim hle a ni.