Nimin khan Lunglei East bialtu MLA Mizoram Youth Commission (MYC)  Chairman Pu Joseph Lalhimpuia chuan Mizorama a hmasa ber atan NLUP beneficiary te tharchhuah leh siamchhuah zawrhna hmunpui tur Rs. 9.26 lakhs senga buatsaih ‘NLUP Sales Emporium’ chu District Industries Centre, Lungleiah a hawng. Vawiinah vek khan MYC Chiarman chuan NEDP kaltlanga Rs.2.70 crores senga sak tur Lunglei Super-Market Annexe lungphum a phum nghal bawk. 

Hawnna inkhawm Pu R.Laltanzuala, General Manager DIC kaihhruaiah Pu Joseph Lalhimpuia chuan Mizorama ‘NLUP Sales Emporium’ hmasa ber chu Lunglei District mipuiten tangkai taka an hman ngei a beisei thu sawiin hmasawnna mellung pawimawh tak a nih thu a sawi a. Mizo thalaiten kawng engkima hma an sawn theihnan sawrkarin chak takin hma a la mek zela, MYC kaltlangin NEET, IIT JEE, UPSC, SSC Coaching te ngawrh taka kalpui a nih bakah thalaiten mahni kutkawih ngeia eizawnna an neih theihna turin Entrepreneurship leh Skill Development te kalpui a nih thu a sawi a. Zirna kawnga hmasawnna ruhrel pawh tih changltung zel niin MYC Office Southern Mizoram Zone chu hawn mai tura peih fel tawh a nih bakah thalaite tan District tinah ‘Youth Centre’ sawrkarin a buatsaih tur thu a sawi bawk. Kum reilote chhungin Commerce and Industries Department hmalakna hlawhtling engemawzat hmuh theih leh tarlan theiha a awm chu lawmawm a tih thu sawiin NABARD kaltlang Rs.10 crores chuanga buatsaih tur Agri Marketing and Infrastructure te, Skill Development Centre hawn thar te, Zobawk khuaa puantah tu ten a thlawna puan an tahna hmunpui tur Handloom Common Facilitation Centre (CFC) sak mek te, Handloom Block Cluster te leh NEDP kaltlanga lei puanthui khawl thar te a thusawi a hian MYC Chairman chuan a tarlang bawk. 

Er Samuel Lalrawngbawla chuan Technical Report a pe a. ‘NLUP Sales Emporium’ hi District Industries Centre (DIC) building Ground Floor ah Rs. 9.26 lakhs senga buatsaih niin Office, Reception Area, thil zawrhna tur Room paruk (6), toilet pahnih leh garage pakat a awm. Lunglei khawpui chhunga bazaar lain ber Sobji Bazar zauhna project ‘Super Market Annexe’ hi NEDP kaltlanga Rs. 2.70 crores senga buatsaih tur niin Basement atanga 3rd floor thleng sak chhoh tur a ni a. Floor tin zau zawng hi 3388 square feet tura ruahman niin Basement hi Parking ah hman a ni dawn a, ground floor ah market area leh office a awm dawn a, 1st floor pumpui chu market area tur niin, 2nd floor ah market area leh parking a awm dawn a, 3rd floor pumpui hi market area a ni bawk ang