3325/2022-2023

Mamit 23rd January, 2023 : Vawiin khan Pu K. Lalrinliana, Hon'ble Minister, Food, Civil Supplies & Consumer Affairs, Local Administration Department leh Fisheries Department chuan Dapchhuah khua-a Luidung humhalh (Riverine Conservation) Awareness Programme chu khuallian niin a hmanpui.

Khuallian chuan luidunga cheng nungchate kan humhalh a tul nachhan tarlangin eizawnna tha kan neih theihna tur a nih bakah kan damkhawchhuahna tur atana kan inmamawh tawn vek vang a ni a ti. Danin a phal chinah, a man hun takah chauh kan man a, a humhalh zawnga tan kan lak chuan an inthlahpung anga, kan ram mipuite tan sumdawnna pawimawh tak a nih theih thu a sawi. Kan ram intodelhna atana pawimawh em em luidunga cheng nungchate chu humhalh thiam a, man phal chin bituk thiam a pawimawh thu a sawi bawk.

Minister chuan kan damkhawchhuah nan luidunga nungchate kan man duh dan kan thlak a ngai a ni tiin a lian leh ei tham chauh man ila, an no pai laiin an lo inthlahpun zel theih nan zuah thin turin a chah a. Luidung nungchate kan nun tihlimtu leh kan ram tungdingtu anih theih nan tan la theuh turin kalkhawmte a chah bawk a ni.

Pu Laldawngliana, Secretary to the Govt. of Mizoram, Fisheries Department pawhin thu sawiin luidung nungchate awmze neia kan humhalh a pawimawh thu a sawi a. Luidung nungcha hmanga eizawngtute'n Sorkarin dan leh hrai a zamte tha taka zawm tura chahin Bomb, Dynamo, Tur leh a dangte hmanga luidung nungchate man leh hrai lo tura chahin, dan bawhchhiatna a nih angin a tilui chu na taka hrem theih an nih thu a sawi. Sangha man theihna Licence chu Fisheries Department atanga lak theih a nih thu a sawi bawk.

He hunah hian Pi Lalremsangpuii, District Fisheries Development Officer, Mamit chuan a lem nena entirin luidung nungcha humhalh dan tur hrang hrang leh humhalhna dan te, dan bawhchhia hrem theihna te chipchiar takin kalkhawmte zirtirna a pe a ni.

Minister hian Dapchhuah Branch YMA hnenah Incentive Award chawimawina Citation leh ? 20,000/- a hlan bawk a ni.

He hun hi Pi Lalremsangpuii, DFDO, Mamit chuan kaihruaiin Pu Lalthantluanga, Secretary, Dapchhuah Branch YMA chuan report a pek bakah Pu F. Vanlallawma, Director, Fisheries Department chuan lawmthu sawina a nei bawk.

Pu K. Lalrinliana, Minister hi Mizoram Angling Association hruaitute'n an tawiawm a. Dapchhuah khawtlang mipuite leh NGO hruaitute he hunah hian an tel a ni.