3326/2022-2023

Champhai, the 23rd January, 2023: Vawiin chawhnu dar 1 khan Champhai DC Conference Hall-ah February ni 1-2, 2023 chhunga zan khat riaka Champhai rawn tlawh tur, Mizoram Governor Dr Hari Babu Kambhampati lo dawn sawn dan tur chungchang Bawrhsap Pu James Lalrinchhana hova rel a ni.

Thukhawm chuan zan khat riaka Champhai rawn tlawh tur Mizoram Governor, Dr. Hari Babu Kambhampati chu Champhai a cham chhunga hun tha leh hlawkthlak tak a hman theih nana ruahmanna siam nise a ti a; hemi atana inpuahchahna tul hrang hrangte sawiho niin tha taka kalpui tura hmalak nise tih a ni a. Sawrkar Department hotute pawh mahni Department enkawl theuh kaltlanga hmalakna langsar leh hlawhtlinnate chhawpchhuak thei tura inruahman theuh tura chah an ni bawk.

Champhaia Sawrkar Department hotute meeting-ah hian Mizoram Governor lo hmuah dan tur leh dawnsawn dan turte bakah a cham chhunga hun hman dan turte sawiho a ni a. Ruahman dan chuan Governor hian a cham chhungin Sawrkar Department hotute, Banker, NGO, Political Party leh Sakhaw hruaitute kawmna hun a neih dawn bakah Tlangsam Winery, Champhai tlawhin Grape chingtute kawmna hun a hmang dawn a. PMAY (Urban), PMAY (Rural) leh PMUY (Ujjwala) hamthatna dawngtute tlawhin a kawm dawn bawk a. Heng bakah hian Zokhawthar tlawhin Assam Rifles Office leh Customs Office-te a tlawh dawn bawk a. Champhai District a tlawh hnu hian Khawzawl District pawh a tlawh nghal dawn bawk a ni.