3327/2022-2023

Aizawl, 23.01.2023: Rualbanlote dawm kan kawnga thawk tha te chawimawina "State Award for the Welfare of Persons with Disabilities" hlanna vawiin khan CM Conference Hall-ah buatsaih a ni a. Chief Minister Pu Zoramthanga chuan he chawimawina hi Pi Chhingpuii leh Commissioner Lalkiamlova te hnenah a hlan a. He state award hi a vawikhat pekna niin, Office of the Commisioner for Persons with Disabilities leh Rural Bank tangkawpin an buatsaih a ni.

Chief Minister chuan chawimawina dawngtute leh a buatsaihtute chungah lawmthu a sawi a. Thil hrang hrangah state huap chawimawina tam tak pekchhuah a lo ni tawh thin a, vawiina State Award sem chu thil tih awm tak a nih thu leh, mi hriat lar lova thahnemngai taka lo thawkte chu fakawm a ti a. Persons with Disabilities kan tihte hi an harsatna neih ang nei ve lote ang bawka hlawhtlinna nei thei an ni. Chutiang tur chuan puihna leh indawmkan erawh a tul thin a ni tiin, hetiang kawnga thawktute chu fak an phu hle a ni, a ti.

Social Welfare Minister Er. Lalrinawma pawhin thu sawiin, vawiina rualbanlo te (Persons with Disabilities) te tana theihtawp lo chhuahtute chawimawina hun buatsaih a ni chu lawmawm a ti a. Rualbanlote dawmkan kawngah leh an hamthatna ngaihtuahsak kawnga sawrkarin a theihtawp a chhuah zel tur thu a sawi a ni.

Vawiin programme hi Persons of Disabilities Commissioner Pi Vanlaldiki Sailo chuan kaihruaiin, chawimawina dawngtu Pi Chhingpuii leh Commissioner Lalkiamlova te hnen atangin thu sawi ngaihthlak a ni bawk. He State Award for the Welfare of Persons with Disabilities hian citation leh pawisafai cheng sing thum a keng tel a ni.

Pi Chhingpuii hi Spastic Society of Mizoram (Society for Rehabilitation of Spastic Children) dintu zing a mi a ni a. Rualbanlote tanpui dan tur chungchang chi hrang paruk vel a ziak a, NIEPID Secunderabad siam rualbanlo chungchang thu chi hrang hrang Brochures 10 chuang Mizo tawngin a lehlinsak a. Rajiv Gandhi Foundation tanpuinain lehkhabu chi hrang hrang eng emaw zat chu Mizo tawngin a let tawh bawk a. Ama hmalakna hian RGF hnuaiah rualbanlote tan bik liau liau film pakhat siam a ni tawh bawk. Pi Chhingpuii hmalakna zelin amah leh a thurualpui te chuan hmun hrang hrangah awareness te an kalpui thin bawk a ni.

Commissioner Lalkiamlova hian Mitdel hawrawp (Braille) bakah Home Management leh anmahni enkawl leh kaihhruai dan a zir a. Kum 1976 a Kalimpongah hna a hmuh chuan an text book te Braille a chhutsak a. Mizoramah School tan tur a nih avangin Mizoram Primary School zirlai bu zawng zawng pawh Mitdel hawrawp (Braille) in a siam nghal vek bawk. January 1977 atangin Kolasibah Mizoram Mitdel School hmasa ber chu a tan a. Official a hawnna erawh chu April ni 15, 1977 ah neih a ni. School chu Integrated School tiin leh a lo ni ta a, mitvarte leh mitdel te chu zirna sikul pakhatah zirtirna inang pek an ni ta a ni. School-a a thawh loh hnuah pawh mitdel naupang te hi a buaipui zui zel a. Sawrkar hna an thawh theihna turin theihtawp a chhuah a. Commissioner Lalkiamlova hian Mitdel ten anmahni hawrawp ngeia Bible an chhiar theihna turin theihtawp a chhuah a. SCERT thawhpuiin Mitdel hawrawp (Braille) tihchangtlunna turin theihtawp a chhuahpui bawk a. Zirlaite tanpui turin 'English and Mizo Braille Primer' bu pawh a siamsak.