Pu K. Lalrinliana, Hon'ble Minister, Food, Civil Supplies & Consumer Affairs, Local Administration, Fisheries chuan vawiin khan Mamit tlawhin Mamit District chhunga Sangha khawitute tana buatsaih training, District Panchayat Resource Center (DPRC) Auditorium a neih chu khuallian ni-a hmanpuiin Mamit khawpui chhunga a Department chan Office hrang hrang a tlawhkual bakah Godown leh LAD Park-te a tlawh.

Training hmanpuitu Minister chuan Mamit District chu Sangha khawitute tana hmun tha ber anih angin Mizoram chawm thei tur khawpa Sangha khawi lama tan la tur leh mithiam zawkte thurawn leh zirtirna ngaichang chunga taimakna nen theihtawp chhuah zel turin a chah a. Ram changkang zawkte thlirin kan ram hian hmalakna tur tam tak kan la nei a, kan la intodelh lo hle a ni a ti. Kristian kan nihna ang pawhin taima taka kan ram intodelhna tura theihtawp kan chhuah tlan a tul thu sawiin chuti zawnga ngaihtuahna kan sen pawh a  hun tawh thu a sawi.Sangha chu duat taka enkawla chaw tha pangngai taka pek chuan thildang zawng ai pawha eizawn nana hmantlak leh hlawk a nih thu a sawi.

Fisheries Minister chuan Sangha chi tha leh a lian tha sem tura hmalaknaah a hlawhtlinna hmuh chhoh mek zel a nih thu sawiin sangha chi te lutuk chu anmahni eiraltu laka a him loh avangin a chi tha chauh sem tura hmalakna kalpui zel a ni dawn a ni a ti. Kan chhehvela hnimhnah kan hmuh mai theihah pawh Sangha tana chaw tha tam tak a awm vangin mithiam zawkte rawn hrehlo turin leh tuman an laksak theih loh thiamna nei ngei tura uluk taka Training turin Mamit District chhunga Sangha khawitute a chah a ni.

Khualzahawm Pu F. Vanlallawma, Jt Director of Fisheries pawhin thusawiin Sangha chu taksa tana hrisel tak a nih avangin a tharchhuah lamah tan kan lak deuh deuh a tul thu a sawi a. Hemi kawnga tui em em leh angaihna hria Minister kan nei chu Sangha dil siamtute kan vannei hle a ni a ti bawk.

He hun hi Pi C. Lallianpuii i/c DFDO, Mamit chuan kaihruaiin Mamit District chhunga Sangha dil siamtute thlen chin leh hmalakna hrang hrang a lem nen a tarlang a. Sangha dil siamtute hnen atangin thusawi ngaihthlak a ni bawk. Training hian naktuk thleng a awh ang.

Minister hian LAD Park chu hawn thuai a nih theihnan hmalak chhoh mek a nih thu a sawi a. District Civil Supply Office thliin a tihchhiat avanga mi Building luah hawha awm mek chu a ngaihpawimawh thu sawiin DCSO Office leh Officer Quarter chu aranglama sak tum a nih thu a sawi bawk.

Pu K. Lalrinliana Minister hi Supply Department atangin Jt Director leh Development Engineer LAD Department bakah khawtlang hruaitute'n an tawiawm a ni.

Attachment

  • Loading attachment...