Sawrkar laipui chuan Indian Forest Act, 1927 siamthat (Amend) a tum chungchangah vawiin khan inrawnkhawmna pawimawh tak Mizoram sawrkara EF&CC Department chuan a ko va. He meeting-hi Forest Minister Pu T.J.Lalnuntluanga, Law Minister ni bawk chuan a kaihhruai a ni.
Indian Forest Act, 1927 chu sawrkar laipuiin siam danglam tumin Indian Forest (Amendment) Act, 2019 ruahman chhinna (draft) a peihfel tawh a. He draft hi India rama State hrang hrangah March ni 14 khan sawrkar laipui chuan a thawn darh a. State sawrkar te ngaih dan a rawn bakah State Sawrkar chu he danin a nghawng tur mipui mimir ngaih dan la a, inrawnkhawmna ko turin a hriattir a. Chumi bawhzui chuan Mizoram sawrkar chuan website ah a theh darh nghal a, tichuan, vawin khan inrawnkawmna (Consulatative meeting) hi neih niin he meeting-a tel tur hian kohhran hruaitute, tlawmngai pawl hrang hrang hruaitute,political party hrang hrangte, sawrkar department hrang hrang aiawh official-te leh Autonomous District Council ami te tel tura sawm an ni.
Mizoram hian Indian Forest Act, 1927 hi hmang lovin Mizoram mipui mimir khawsak dan leh nunphung nena inmil dan hranpa Mizoram Forest Act, 1955 a nei a. Indian Forest (Amendment) Act, 2019 hi Sawrkar Laipuiin a pass chuan Mizoramin dan kan neih mek Mizoram Forest Act, 1955 hi hman chhunzawm theih a ni dawn tawh lo a ni.
Meeting chuan Draft Indian Forest (Amendment) Act, 2019 hi ngun takin a zirchiang a. Section hrang hrang thurchhuah niin Mizoram State leh mipuite a nghawng dan tur zirho a nih hnuah he dan thar hian India Danpui (Constitution) Article 371 G-a Mizoram humhalh bikna provision, a bik taka Mizo Customary law kan neih mek te, ram lei leh hralh chungchanga thuneihna a neih mek te nasa takin a khawih (encroach) dawn a hriat ani a. Mizoramin dan a hman mek heng - The Lushai Hills District (Village Councils) Act, 1953 te; The Mizoram (Prevention & Control of Fire) Rules, 2001 te; The Mizoram Forest Act, 1955 leh The Mizoram (Land Revenue) Act, 2013 te chu a vai emaw a then lai emaw tih tawp a nih dawn mai bakah India Danpui (Constitution) Sixth Schedule hnuaia Autonomous District Council area ho in a Constitution hnuaia anmahni tan a dan siam theihna thuneihna a pek, Sixth Schedule hnuaia Paragraph 3 (a), (b), (d) te pawh a la bo dawn ani. Heng chhan hrang hrangte avang hian vawina inrawnkhawmna, Consultative Meeting chuan Mizoram mipuite hmakhua ngaihtuahin Draft Indian Forest (Amendment) Act, 2019 chu a nihna ang anga pawm theih niin a hre lo va, sawrkar laipuiah thlen ni se an ti.
Pu T.J. Lalnuntluanga, , Environment, Forest and Climate Change Minister chuan kan ram leh hnam humhimna tur atan mahni pawl bik ngaihtuah lovin, ram leh hnam himna leh thatna tur ngaihtuah turin kal khawmte leh mipuite a sawm a. Tin, hemi chungchanga rawtna te pawh tha taka dawngsawng turin Mizoram sawrkar chu a in hawng reng ani tih thu a sawi bawk.
