Vawiin hian Serchhip Auditorium ah Serchhip District chhunga Branch YMA panga, Lui dunga sangha leh nungcha humhalh thate hnenah lawmman (incentive Awards) pek an ni a, Pu K. Lalrinliana, Minister of State, Fisheries, LAD, FCS&CA, etc chu khuallian niin lawmman te hi a sem.

Lawmman dawngtu Branch YMA panga, Bungtlang Vengsang Branch, Bungtlang Chhim Veng Branch, Hmunzawl Branch, Ngentiang Branch leh Chhingchhip Venghlun Branch te hnena lawmman a hlan zawhah Minister hian thusawiin, YMA ten lui leh lui dung nungchate hmangaih taka an humhalhna hian mipuite thinlungah rah tha chhuah zel se a duh thu a sawi a. Serchhip district chhunga YMA branch 30 zetin anmahni ban phak chin lui te nasa taka humhalh nachang an lo hre chho zel chu thil ropui tak nia a hriat thu a sawi a ni. Minister chuan, Lui dung humhalhtuten anmahni tanpuitu tur dan fumfe kan nei tawk lo ni a kan inhriat thin kha sawrkar chuan a hre reng a, tun Assembly hnuhnung berah khan dan fel fai tak pass niin hei hian lui humhalhtute a tanpuia a tihchak kan beisei a, a tul ang zela ennawn leh siam that te pawh a theih zel tura beisei a ni, a ti. Kan rama lui te uluk taka kan humhalha mumal taka kan enkawl theih chuan, sangha dil lama kan tharchhuah te nen; kan sangha mamawh za zela sawmriat vel hi chu kan thar thei maiin ka ring a, kan lui te tha taka humhalh hi kan Sangha mamawh tharchhuah nana thil pawimawh tak a a tling a ni, a ti. Pu K. Lalrinliana chuan Mizoramin ei leh barah hmasawnna tur a la ngah hle tih sawiin, kan chaw pui ber buh kan mamawh zat kan thar lo va, sa kan mamawh zat kan thar lo va, thei (fruits) pawh kan mamawh zat kan thar hek lo.  Heng kan ram mamawh chi hrang hrang te hi SEDP atangin umzui an ni dawn a, peng hrang hrangah chak taka hna kan thawh theih nan Board sawm leh pali din niin Fisheries lama hma la tu turin Veterinary, Fishery & Sericulture Board pawh din a ni a, sangha dil lama hmasawnna hna te, kan lui neihsa atanga hmalakna te kan la kalpui zel dawn a ni, tiin sawrkarin sangha vulhtute hamthatna leh sangha tharchhuah lama hmalak a tum dan tlangpui te a tarlang bawk a ni.

Khualzahawm Pu Thlamuana, Secretary, Fisheries, Government of Mizoram pawhin thusawiin Mizoram chuan tun Assembly Session hnuhnung berah khan Fisheries Rules mumal tak a nei ta a, kum 2002 velah Act kan nei tana, Rules a nei mai lo deuh va, ennawn ngai leh siam that ngai te a lo awm hlek hlek bawk a, tunah chuan lui dung humhalhtuten kan nghahhlelh em em thin dan kan nei ta a, nasa zawkin kan lui nungchate kan humhalh thei dawn a ni, a ti a. Tin, lui dung humhalh hnathawktute hah lutuk tur lo chhawm dawl ve na tur The Mizoram Fisheries Conservation Reward Scheme, 2019 te pawh kan neih thar tak thute sawiin, YMA te inpekna leh an thawhrimnaah lawmthu a sawi a, Sangha dil neitute tana sawrkar ruahmanna thenkhat a tarlang bawk.

Khuallian tawiawm tu Pu C. Lalramzauva, Adviser to Chief Minister leh Pu C. Lalmuanpuia, MLA, Vice Chairman, Veterinary, Fishery & Sericulture Development Board, te pawhin thusawina neiin, Pu R. Sanghmingthanga, President, Sub Hqtrs YMA leh lawmman dawngtute aiawhin Pu PC Vanneia, Chhingchhin ten pawhin thusawina hun an hmang a. Pi Zonuntluangi, DFDO, Serchhip chuan Serchhip District chhunga lui dung humhalh chanchin tlangpui report pein, kum 1992 ah N. Mualchengin an khaw ram lui Varhva chu an lo humhalh tan tawh a, vawiin thlengin khauh taka humhalhin Varhva chu lui hmingthang takah an chhuah a, an meichher lo chhit tawh kal zelah tunah hian district chhunga Branch YMA 30 ten khauh takin an huamchhungah lui an humhalh hlawm a ni, a ti a. Lui humhalh thate hnenah lawmman hi lo sem tawh thin a nih thu sawiin, Branch pasarih hnenah lawmman pek an lo ni tawh a, tun tumah hian Branch panga hnenah hlan niin heng an lui humhalh te hi mithiam zawkte nena zirchianna te neiin Sangha chi tharte pawh hmuhchhuah an nih hial thu a sawi a ni.

He hun hi Pu F. Vanlallawma, Director, Fisheries chuan a kaihruaia, lui humhalh thate hnena an lawmman sem chu Social Welfare Department kaltlanga Article 275 (1) fund an dawn hmanga an sem a nih thusawiin lawmman dawngtute hi Rs. 30000, Citation leh Momento an hlan thu a tarlang a ni.

Vawiina lawmman hlannaah hian Pi Sangchhin Chinzah, DC Serchhip, Serchhip a Head of Offices, MJA, YMA hruaitute, zirlai naupangte, lawmman dawngtu Branch hrang hrang aiawh YMA members engemawzat leh sawm bik mi pawimawh te an tel a ni.