Nimin khan Parliamentary Secretary Pu K. Lalrinthanga hovin Kolasib DC Conference Hall-ah Kolasib a Sawrkar Pisa hrang hranga hotu ten Serlui MLA bial chhunga Model Village atana thlan Saiphai a, he ruahmanna kalpui dan tur chungchanga meeting neiin hmalak dan tur chungchang an sawiho.
Pu K. Lalrinthanga chuan Model Village atan hian Sawrkar in a hranpa a sum a dah loh avangin Department ten an hmalakna awmsa bakah entawn tlak a hmalakna tur an sum neihsa anga ruahmanna siam turin a chah a. Saiphai mipuite pawh Model Village atan thlan an nih anga an nunphung te entawntlak leh mite tana malsawmna ni thei tura inbuatsaih turin a chah bawk.
Department hrang hrang aiawhten an Department Scheme kalpui mek Model Village atana seng luh theih ang chi chungchangte sawiin hmalak tawhna leh hmalakna tura ruahmanna an neih te tarlan a ni.
He meeting ah hian Kolasib DC Pu Jitender Yadav leh a thawhpui te bakah Kolasib a Head of Office te an tel kim hle a ni.
Rural Development zirchianna atangin Model Village atana thlan Saiphai ah hian chhungkaw 423 an cheng mek a, BPL chhungkua 52 an awm a. Thlai leh buh chin theihna ram hectare 3974.2 awm mekin kum kalta khan buh 110.5 ton an tharchhuak a ni.
