Serlui Constituency chhunga MLA Model Village Saiphai khua a hmalak dan tur chu vawiin khan Saiphai Community Hall-ah Parliamentary Secretary leh Bialtu MLA ni bawk Pu K.Lalrinthanga hovin, Kolasib District-a Department hotulute leh Saiphai khaw mipuiten an sawi ho.

Pu Lalfakzuala BDO, Bilkhawthlir kaihhruaina a neih, Gram Sabha ah hian Parliamentary Secretary Pu K.Lalrinthanga chuan thu sawiin Model Village atan central sorkar atanga sum ruahman bik a awm loh thu sawiin, Model Village ni tura pawimawh ber chu mipuiten rilru dik kan put hi a ni a ti a.Sorkar in hmasawnna kawng dapa hma a lakna hrang hrangah mipuite hi harsatna siamtu kan ni fo thin tih sawiin, Saiphai khua hmasawnna atana sorkar department hrang hrangte hmalakna ah harsatna siamtu ni lova, engtin nge ka tangkai ve theih ang tih ngaihtuah chunga tanpuitu ni zawk turin kalkhawmte chu a fuih a, chu chuan midang te tana entawntlak Model Village dik takah min siam dawn a ni a ti bawk.

He hunah hian Pu Jitender Yadav DC Kolasib pawhin thu sawiin, Model Village kan tih hian hmasawnna lian tham a lo lut rup rup dawn tihna nilovin, thil te tham nia kan ngaih atangin hma kan la tan dawn a ni a ti a. He hmalakna atana Department hrang hrangin Village Development Plan an siam te chu Gram Sabha in a pawmpui a ngaih avangin, Gram Sabha tel lo hi chuan SAGY Model Village hi kalpui theih ani lo a ti bawk.

He Gram sabha ah hian Pi Maria C.T. Zuali Director ,SIRD pawhin thu sawiin, Kolasib District-a Department hrang hrang hotute an kal tha hle a, anni hian Model Village atana hma lak dan tur ruahmanna an siam te mipui kalkhawmte hma ah pharhin an sawiho nghal a ni.