Parliamentary Secretary i/c Horticulture etc. Pu K. Lalrinthanga chuan, Mizoten kan chhiat kan thata innghahna tur pawl chhenfakawm tak YMA kan nei hi kan vannei hle a ni, a ti.

Saiphai khua Community Hall-a Saiphai Hmar Veng Branch YMA day hmanpuiin nimin khan he thu hi a sawi a. Pu Lalrinthanga chuan, YMA hi midangte tan malsawmna a thlen theih nana din a nih ang ngeiin kan mizo tlawmngaihna dik tak nen miharsa te tanpui a, tanpui ngaite pui tur kan ni tih kan inhriat thar fo hi a tul hle a ni, a ti a. Kan khawtlang nun siam tha a tan la zel tur leh YMA nihphung tivul zel turin kan pipu nun ze mawi tak kha kan chhawm nun zel a ngai a ni, a ti a ni.

Sawrkar hmalakna hrang hrang tarlangin Pu Lalrinthanga chuan, tunah hian Mizoramah sawrkar nghet tak kan nei mek a, mi rethei leh eizawnna ngelnghet neilo te tan NLUP chu tluang taka kalpui reng a ni a. NLUP hi ala dawng velo te hnenah pawh sem a ni zel dawn a ni, a ti a. Tunah hian power lama Zoram kan hnianghnar zawk theih nan Hydel Project engemawzah kalpui mek a ni a, Zoram leilung hausakna haichhuah kawngah pawh Oil te ngawrh taka zawn a ni a, inkalpawhna tha- kawngpui sial kawngah pawh sawrkar chuan a tha a thlah lo a ni, a ti a ni. Nimin vek khan Pu K. Lalrinthanga hian Saiphai khuaah YMA Library a hawng a. Lehkhabu hlui hi ro hlu tak, kan thil hriat kan theihnghilh tawhte leh kanla hriatloh pawh min hrilhtu a nih avangin a hlu a, he Library-ah hian thangthar zelte la chhawr theih turin lehkhabu pek pawh i uar ang u, a ti a ni.

Saiphai Library hi kum 1994 khan din tan a ni a, Raja Ram Mohan Roy Research Foundation atangin Rs 6 lakh ( Cheng nuai ruk) a sak nan hian hmuin building hi an sa pum a, tunah hian lehkhabu 1150 a awm mek a ni.