Vawiin khan ICT Minister Pu Lal Thanzara chuan Sawrkar Laipui Ministry of Information Communication Technology, Department of Telecommunications hnuaia awm Telecom Enforcement, Resource & Monitoring Cell; ICT Department, Mizoram Sawrkar; Reliance Infocom Limited leh Hmarchaka cancer lama mithiamte inzawmkhawm pawl Association of Oncologists – North East India tangkawp tena Mobile Tower leh Radiation chungchangah Seminar, Synod Conference Centre-ah an buatsaih chu khuallian niin a hmanpui a, AMC Chairman Pu C.T. Zakhuma chu he hun ah hian khualzahawm a ni.

Pu Lal Thanzara chuan kan nitin khawsakna nen mobile phone hi a inzawm tlat tawh a, a tello hian nitin khawsak a harsa ta hle mai a, fimkhur zawka kan hman a ngai zawk ta hial a ni, a ti. Mobile Service heti taka kan hman tangkai lai hian hriselna atana a hlauhawmna lam sawi rik a tam avangin kan fimkhurna tur lam he seminar atang hian kan hriat belh ngei ka beisei a ni, a ti a. Mobile tower atanga radiation hian hriselna lam a khawih pawi theih dan rilrua zawhna awm thin te hi engemaw chen seminar hmang hian hriatfiah theih ngei a beisei thu a sawi bawk.

ICT Minister hian ICT Department hmalak tawhna leh hmalakna thenkhatte sawi langin sawrkar tha zawk leh chak zawk kan neih theihna turin ICT hi Sawrkar chuan tangkai taka hman tumin tan lak chho mek anih thu te leh mipuite hnenah Sawrkar hmalakna hrang hrang mipui hnena pek te lo dawnsawnna tura mobile phone hi tangkai taka hman chhoh mek tum a nih thu te a sawi a ni.

AMC Chairman Pu C.T. Zakhuma chuan mobile tower atanga radiation chhuak mihring tana pawi tih chungchang hi sawi a tam a chuvangin mobile tower bun dawn a NOC pek hi mipui himna ngaituahin fimkhur takin an kal pui thu a sawi a. Seminar ah hian mobile tower leh radiation hian mihring hriselna atan pawi thei leh pawi thei lo chin chiang zawka kalkhawmte, a bikin takin Local Council hruaituten an hriat ngei a beisei thu a sawi bawk.

Seminar-a thu hmahruai sawitu Pu P.L. Thanga, Member Secretary, State Planning Board chuan mobile service pechhuaktu company ten mobile service tha zawk pekna kawnga hma an lak chak loh thu te leh mobile service chak zawk 4G hman theih hunah chuan telemedicine, e-governance leh zirna lamah pawh chak zawka hmasawnna tam tak a awm theih thu te a sawi a ni. Seminar chawhma session hi Pu C. Lalhmachhuana, Secretary, ICT Department chuan kaihruaiin Pu Lalthlamuana, Chief Informatics Officer in lawmthu sawiin hun a khar a ni.

Seminar chawhnu session-ah hian mithiam panga ten thusawina hun leh Seminar thupui sawizauna an nei a, mithiamte hi Chief Technical Officer (Assam, NE), Reliance Infocom Limited; Pu T.K. Paul, DDG Telecom Enforcement, Resource and Monitoring Cell (TERM) NE 1, Shillong; Pu Apurba Das, DDG Telecom Enforcement, Resource and Monitoring Cell (TERM) NE 1, Dimapur; Dr. R. Ravi Kannan, President Association of Oncologists in North East India leh Dr. Jeremy L. Pautu, Director, Mizoram State Cancer Institute te an ni. Presentation zawh ah hian sawihona leh zawhna leh chhanna hunte hman a ni bawk.

Seminar ah hian AMC Councillors, Aizawl veng hrang hranga Local Council hruaitute leh Sawrkar Department hrang hrang aiawh te an tel kim hle a ni.

Reliance Infocom Limited hian internet chak zawk 4G chu Mizoram a tan tumin Sawrkar an dawr mek a ni.