Remote Sensing leh GIS thiamna hmanga Mizoram leilung awm dan zirchianna leh hman tangkai theih tur dahkhawmna - Space Based Information Kiosk (SBIK) chu vawiin chawhnu dar 1:00 khan Chief Secretary Pi L.Tochhongi’n C.S. Conference Room ah a hawng.

SBIK hawnna inkhawmah hian North Eastern Space Application Centre (NESAC) hnathawh te thlirho a ni a. Chief Secretary chuan Department of Space leh a hnuaia centre hrang hrang - NRSC, NESAC leh Mizoram Remote Sensing Application Centre (MIRSAC) te hmalakna te chuan ram hmasawnna tura hmalakna ah hmun pawimawh tak a chang a ni tiin ram leh mipui hmasawnna tura ruahmanna duanna ah leh bawhzuina kawngah te pawh hmanraw tangkai tak a nih dan te a tarlang a. An thil zirchianna leh thawhrah te chuan hriatna a tizauvin hmasawnna hna pawh chak zawkin min thawhtir thei a ni, a ti. Vansang thiamna (space technology) hmanga Mizoram leilung hausakna (natural resources) an zir chhuah te pawh tangkai takin hman mek a nih thu a tarlang a. NESAC bultuma MIRSAC nena an hnathawh, Space Based Information Kiosk-a tui leh leilung awm dan te, chhiatrupna lo thlen thulh pawha tangkai tur data chi hrang hrang te chu line department ten tangkai taka an hman ngei a beisei thu a sawi bawk.

Dr R.K.Lallianthanga, Project Director, MIRSAC pawhin thu sawiin Remote Sensing leh GIS thiamna chuan Agriculture te, Forestry te, disaster management ah te, leilung hausakna zir leh enkawlna (natural resources management) ah te, boruak inthlak danglam dan (climate change) zirna leh thil dang tam takah hman tangkai mek a nih thu a sawi a. MIRSAC chuan Central leh State atangin project chi hrang hrang a thawk tawhin a thawk mek bawk a, chung zinga za zela 50 (50%) vel chu Department of Space leh a hnuaia centre te nena thawhho a ni. Heng a hnathawh te hi line department hrang hrang ten project siamna atan leh hnathawh nan tangkai takin an hmang mek bawk a ni, a ti a. SBIK pawh hi NESAC-in a bul tumin MIRSAC nen thawkhova vansang thiamna hmanga buatsaih a ni a, data te hi awlsam taka computer hmanga lakchhuah theih a nih avangin line department te tan a tangkai hle dawn a ni, a ti.

NESAC Director Dr S.Sudhakar chuan NESAC hnathawh leh hmalakna hrang hrang te a sawifiah a. Department of Space hnuaia NRSC te leh hmarchhaka state hrang hranga Remote Sensing Centre te nen vansang thiamna hmanga an thawhho dan te sawiin MIRSAC chu India ramah pawh hna thawk tha ber zinga mi a nih thu a tarlang a. MIRSAC nen tangkawpin Mizoram Forest Working Plan te, Land Use Land Cover Mapping leh project dang an thawh zawh tawh thu a sawifiah a. Tunah hian Space based information support for decentralised planning (SISDP) an thawh mek thu leh Rice crop acreage mapping te pawh thawh a nih tur thu a sawi a. SBIK hi then nga (module 5) ah hetiang hian then a ni - Administrative module, land resources module, water resources module, action plan module leh disaster module. Heng module tin te hi duh anga tih len theih a nih thu leh mahni duhna lai la chhuaka print mai theih a nih thu sawiin Mizoram hmasawnna tura ruahmanna tha tak a nih tur thu a sawi lang bawk. Dr S.Sudhakar chuan NESAC, NRSC leh MIRSAC te zirchianna data pawimawh tak tak te chu a hlutna angin department leh mipui ten an chhawr tangkai tawk lo tiin uar zawka inzirtir tul a tih thu a sawi a, department hrang hrang te chu an data neih ang ang te hman phalsak turin a ngen bawk a ni.

He inkhawmah hian Dr Vanlalzara, Chief Scientific Officer, Directorate of Science and Technology chuan Mizoram hmasawnna atana tangkai tur SBIK buatsaih a ni ta chu lawmawm a tih thu a sawi a, SBIK hawnna inkhawmah hian Department hrang hranga Secretary/Commissioner leh Officer te, NESAC Scientists te leh MIRSAC Scientists thahnem tak an tel a ni.