Health & Family Welfare Minister Pu Lal Thanzara chuan vawiin chawhnu khan Mizoram State Cancer Institute a tlawh a, Cancer damdawiin hmun hma te fangkualin Institute hnuaia Department peng hrang hrang, Damlo ward, cancer hemna khawl te a tlawh kual. Minister hi Deputy Speaker leh bialtu MLA ni bawk Pu R. Lalrinawma leh Director, Hospital & Medical Education, Dr. Lalbiakkima ten an tawiawm a.
Health Minister chuan cancer veite enkawlna lamah Institute a thawk doctor, nurse leh thawktu dangte inpekna chu fakawm leh lawmawm tiin an duty piah bak damlo te tan nasa taka rawng an bawl ngei a rin thu a sawi a. Thawktu lamah indaihlohna an thlen chu Department hotu te rawn a dah belh thei dan kawng zawn a tum thu a sawi. Damlo te chawhmeh man tur pawisa engemaw zat doctor te a hlan bawk a ni.
Mizoram State Cancer Institute hnathawkten an harsatna leh thawktu lamah indaihlohna chungchang te hi Minister hnenah an thlen a, Cancer damdawiin ram chhunga mimal LSC te chu enfiah sak turin leh damdawi in ram chin humhalh tura hma lak sak turin an ngen bawk a ni.
Mizoram State Cancer Institute ah hian khum 40 a awm a, hemi bakah hian day care(riah ngai lo ang chi) mi 20 enkawlna a awm bawk a. Doctor 9 leh nurse 17 thawktu an awm a, chung zingah doctor thenkhatte chu cancer lamah thiamna bik neite an ni a, Medical Physicist 2 leh Radio Technologist 1 te an awm bawk a ni.
Mizoram State Cancer Institute hi cheng vaibelchhe 45 senga tihchangtlun tuma hma lak mek a ni a, Tertiary Cancer Care Centre-ah hlankai tum a ni bawk.
Mizoram State Cancer Institute hi Hmarchhaka cancer dawmdawi in a inhemna kaihhnawih fimkhurna chungchang Radio Safety programme tha taka kalpui awmchhun niin fimkhurna chungchanga an hmalakna hi North Eastern Council chuan tha tiin hetiang ang hi Hmarchaka cancer dawidawi in zawng zawnga kalpui ve turin NEC chuan hma lak an tum a ni.
