Vawiin chawhma khan Agriculture Conference Hall-ah Agriculture Minister Pu K.S Thanga hovin Agriculture Department hnuaia Research & Extension (R&E) scheme leh hnathawh chungchang Review Meeting neih a ni. 

Agriculture Minister chuan Krishi Vigyan Kendra (KVK ) hnuaia scientist leh hnathawkte chu ram tana thawktu an nih hre reng turin a chah a. Zir chianna (research) leh tihchhinna (trial) awm lova loneitute thlai leh thei chin tir hi awm tawh lo se tiin loneitute tul lova tawrh tirna a ni, a ti a. Hemi atana hmalakna kawngah KVK an pawimawh hle a ni, a ti a. Tun dinhmun aia thuk zawkin kuthnathawktute leh department pawhin an phochhuah tlaka in thawh a ngai a ni, a ti a. Department dang a bikin Horticulture leh AH&Vety nen thawhhona tha nei turin kalkhawmte chu a fuih a. Inpekna thuk zawk leh thahnemngaihna sang zawk hian thil tha tak a thlen thei a ni tiin tun dinhmun aia sang zawk thlen tum turin a chah a. Minister chuan loneituten an hnathawh dan a bul atanga a tawp thlengin bel takin an hre tur a ni tiin, Agriculture Department-in hemi hlawlhtlinna atana tan la lehzual turin a fuih a. Loneitute training pek leh lei enkawl dan tur hrilhhriat a pawimawh thu sawiin training an buatsaihah pawh tui zawka hna an thawh theihna tur a tel a ngaih thu a sawi a. Kan hnathawhte hi phochhuah thiam a tul a ni tiin media hman tangkai kawngah tan lak a ngai a ni, a ti a. Loneitute harsatna chu theihtawpa ngaihtuahpui turin a chah a. Aizawl district chhungah kuthnathawktute an tam thu sawiin district danga hma lak anih ang bawk hian Aizawlah hma lak a ngaih thu a sawi a ni.  

Agriculture Department-a Directorate of Agriculture (Research & Extension) hnuaiah hian Education and Training-ah Integrated Training Centre (ITC) Hnahthial awmin Research and Training hnuaiah Krishi Vigyan Kendra (KVK) pasarih- Kolasib, Lunglei, Champhai, Lawngtlai, Siaha, Serchhip leh Mamit an awm a. KVK kalpuina district 7-ah hian Senior Scientist & Head 1 theuh an awm bawk a. Department chuan technology hmangin district hrang hrangah training leh Front Line Demonstration a kalpui mek a ni. 

Meeting hi Agriculture Department  Addl.Secretary, Pi K. Vanlalrawni chuan a kaihruai a. Agriculture Director (Research & Education) Pu Lalthansiama chuan inlawmna thu a sawi a. Dr. Samuel Lalliansanga, AEO chuan Krishi Vigyan Kendra (KVK) chungchang report a pe a. Chungte chu- kumkhat chhunga KVK ten Action Plan an siam dante, Farmers Training pek an nih thute, kum 2017-2018 chhunga district-7 a KVK ten loneitute training an pek tur leh soil test an tum thute a ni a. KVK centre hrang hrang leh ITC Hnahthial ten presentation an nei a. Jt. Director (R&E) Pu R.L.Thanzuala chuan lawmthu sawina in hun a khar a ni. He hunah hian Directorate of Agriculture ( Research & Extension) hnathawkte, State Agricultural Management & Extension Training Institute (SAMETI) leh district hrang hranga KVK scientist-te an tel kim hle a ni.