School Education Department chuan zirna tihhmasawn nan leh zirna lama sorkar hnathawh puanzarna turin TV Programme Doordardhan Kendra (DDK), Aizawl nen thawhdunna tur thuthlung (Memorandum of Agreement) vawiin khan Directorate of School Education Conference Hall-ah an ziak a, Pu H.Rohluna, Minister, School Education in a telpui.

He hunah hian Pu H.Rohluna chuan zirna tihhmasawn nan sorkarin theihtawpin hma a la zel a ni a ti a, hmalakna pakhat TV Programme kum 2015 atanga hlawhtling taka kalpui a lo ni tawh chu thawktute thawhhona that vang a nih thu sawiin, lawmawm a tih thu leh kumin atana thawhhona thuthlung ziah thar leh pawh hi hlawhtling taka kalpui ngei a nih a beisei thu a sawi.

Educational TV Programme hi 17^th July, 2015 atang khan DDK nen thawhhona thuthlung siamin kalpui a lo ni tawh a. Hemi atan hian Mizoram sorkar chuan Programme Advisory Committee a din a, he Committee-ah hian Directorate of School Education, SCERT, MBSE, SSA leh RMSA te an tel a ni. He programme atan hian district tinah District Educational Television Programme Committee (DETPC) chu District Education Officer kaihhruaina hnuaiah din nghal a ni a, district chhunga zirna hmasawnna leh hmalakna te programme a chhuah tura duan thin a ni. Eductional TV Programme enkawl tur hian Media Cell din a ni a, August 27, 2015 atanga kumin September, 2017 thleng khan Episode 103 tihchhuah tawh a ni a. He programme tihchhuahna atana senso te hi Department panga – Directorate of School Education, SCERT, MBSE, SSA leh RMSA ten an intumsem a ni.  Vawiina thawhhona thuthlung ziah hian September 2017 – October, 2018 thleng a huam ang. Educational TV Programme hi Ningani (Thursday) zan dar 6:00 – 6:30 PM-ah tihchhuah thin a ni ang. Kumin hian School Education Department leh Science Teacher Association of Mizoram (STAM) tangdun in Class-X zirlaite tan Science leh Mathematics subject zirtirna video an siam, hmun kilkhawr zawk a chengte  leh zirtirtu nei tha lo te tana an buatsaih chu tihchhuah tum a ni bawk.

Vawiin a thawhhona thuthlung ziah hi School Education Department, Mizoram Sorkar aiawhin Pi Esther Lal Ruatkimi, Commissioner & Secretary School Education in ziakin, DDK lam atangin Pu Womchan Ramsan, Head of Programme in a ziak a ni. He thawhhona thuthlung ziah inkhawm hi Pi Esther Lal Ruatkimi, Commissioner & Secretary School Education in a kaihruai a, Pu K.Lalthawmmawia, Director School Education chuan he TV Programme lo kalpui tawh dan te report a pe a. He hun hi Pu Joseph Lalhimpuia, MLA pawhin a telpui a ni.