4806/2024-2025

Aizawl 1st November, 2024 : Vawiin khan Mizoram Engineering Service Association (MESA)-in an Annual General Conference vawi 43-na Multipurpose Hall, Berawtlang-a an hman chu Pu K. Sapdanga DP&AR Minister chuan khuallian niin a hmanpui. 

Khuallian Pu K. Sapdanga, Minister chuan Technical lam zir tum, hlawhtling ta lo ka nih laia vawiina MESA General Conference-a khuallian ni theia ka awm hi ka lawm hle a ni tiin Engineer te chu mipui mamawh sawi ngai miah lo khawihtu an nih avangin an tih that aiin an tih that loh lai a langsar em em thin a, mipuite'n kan chungah beiseina sang tak an nei a, kan indaih lo chung pawha kan thawh nasat a ngai lehzual a ni a ti. Engineering Department chu ram ruhrel an nih angin an discipline leh inenkawl dan pawh entawntlak tak an ni a, chutihlaiin an hna hmawrbawkna, a field execution lamah supervision kan tlachham deuh em tih chu an ngaihtuahna-ah awm se a duh thu a sawi.

Minister chuan Year of consolation leh inrenchem kalpui a nih mek avanga works department lamah harsatna kan nei chu pawi a tih thu sawiin engineer te chu an hna kuttling leh nasa lehzuala thawk turin a chah a. Works department chu aikal la tamna a ni thin a, tunah chuan thuawi taka Sawrkar hmalakna an thlawpna-ah lawmthu a sawi bakah mipuite khawsakna kawngah tun aia awlsam zawk a an awm theih nan leh kan state a per Capita income a lo pun deuh deuh theih nan an pawimawh em avang leh kan ram hmasawnna tura innghahna bulpui ber an nih avangin tan la sauh sauh turin a chah bawk a ni.

Er. Lalhminghlua, General Secretary report tarlan danin tunah hian MESA Member hi 286 an awm mek a. Report hun chhungin member thar 13 leh pension a chhuak mi 26 an awm a ni. Conference leh conference inkarah member 71-in promotion hmuin member thi 3 an awm a. Heng Works department pali, PWD-ah 154 awmin 62 hnawhkhah loh a awm a, P&E -ah Sanction post 95 awmin 41 a ruak a. PHED-ah Sanction post 72 awmin 17 a ruak mek bawk a, I&WD-ah Sanction post 17-ah 10 hnawhkhah lohin a awm thu a sawi. MESA hi Ni 14.05.1972-ah din niin Kum 2022 khan an Golden Jubilee pawh an lo lawm tawh a ni. 

He hunah hian Er. PC David Lalrinliana, Finance Secretary kaihhruaiin Member boral sunna hun hman a ni. Er. Lalhminghlua, GS kaihhruaiin Pensioner thlahna hun hman anih bakah Er. Lalrinzuala Ralte, Vice President kaihhruaina hnuaiah Promotion lawmpuina leh Member thar lawmna neih a ni bawk. 

MESA Annual General Conference-ah hian chawhma lamah rorel inkhawm neih a ni a. Thil dang zingah heng a hnuaia Agenda te hi sawi ho-a pass a ni.

1) MESA chuan Sorkar Policy tihlawhtling turin Sorkar theihtawp a tawiawm tha a ti a, a bikin Engineering Works-ah phei chuan theihtawpchhuah turin member-te an ngen a ni.

2) MESA chuan tunhnaia Sorkar Notification No.G.17012/1/2022-F.Est/pt.II dated:22.10.2024 a tihchhuahin a sawi, Non-Works Department tana Engineering Works thawk ve thei tura a tih chu tha lo a ti a. He Notification hi ennawn tha leh a, hnukkir turin Sorkarah ngen nise an ti bawk. 

Chawhnu lamah Official Function hman zui niin Er. H. Zoramliana, an pawl President-in kalkhawmte lawmna thu a sawi a. Er. K. Hamlet, Jt. Secy-in hun tawp lawmthu sawina a nei thung. Pensioner mi 4 te atangin Member te fuihna thuchah ngaihthlak a ni bawk.