4805/2024-2025

2024 Sahmulphah thla ni 1: Lunglei Municipal Council (LMC) Board of Councillors (BoC) chu vawiin khan an Chairman, Pu Lalzuithanga kaihhruaiin BoC Hall, Convention Centre, Lungleiah a ṭum kua nan an ṭhu khawm.

Vawiin LMC BoC ṭhut khawmah hian thu ngaihtuah tura chhawp chhuah pali awmin, pathum chu a ṭul anga sawi ho leh siam rem a nih hnuah bawhzui tura pawm (pass) a ni a. Zawhna leh chhanna hun hman a ni bawk.

LMC BoC ṭhu khawm chuan Lunglei khawpui chhungah mipuite man tlawm zawka an veivah theih nan bus tlantir tura hma lak ṭha an ti a. Amaherawhchu, LMC sum dinhmun thlirin, sum awm sa aṭanga hma lak theih a nih dawn loh avangin state sawrkarah a remchan dana bawhzui ni se, an ti a. Mizoram sawrkarin LMC tana sanctioned post 29 hnawh khah phalna a pek tawh chu LMC budget awm sa aṭanga hlawh pek tur a nih dawn avangin sum dinhmunin a tlin tawk leh mamawh hmasa zual hnawh khat tura hma lak phawt ni se tiin, Mizoram Public Service Commission (MPSC) kal tlanga lak ngai post chi hrang palia post panga hnawh khat tur leh Municipal Service Selection Board (MSSB) kal tlanga lak theih zingah casual employee angin skilled 8 leh unskilled 5 la tura hma lak an rel a ni.

Zawhna leh chhanna huna tar lan a nih danin, Lunglei khawpui chhung kawngpui kama in sakna bungrua emaw, bungrua eng chi pawh dah a nih dawn chuan LMC-ah ziakin dilna theh luh tur a ni tia July ni 1, 2024-a hriattirna (notice) chhuah a nih hnuah LMC-ah dilna pali a luh tawh thu leh darkar 24 aia rei lo dah phalna pek an nih thu tar lan a ni a. June ni 25, 2024 khan Lunglei Municipal Council leh LMC Area chhunga Local Council te'n Lunglei khawpui chhungah mipui leh lirthei che vel him zawk nan leh garage nei lote felfai zawka enkawl an nih theih nan vantlang hmun leh kawng kama lirthei hun dan ruahmanna siam tura thawh dunna thuthlung (Memorandum of Understanding - MoU) an ziah fel thu leh hemi kawngah hian ruahmanna siam leh hma lak chhoh mek a nih thu tar lan a ni bawk.

Vawiina LMC Board of Councillors ṭhut khawmah hian elected councillor sawm leh pakhat (11) an kal kim a. LMC Chief Executive Officer Pu Donny Lalruatsanga'n a telpui bawk a ni.

Attachment

  • Loading attachment...