Vawiin chawhma Dar 11:00 AM khan Pu K.K. Razdan, Chief Engineer Pushpak (P) leh Pi Harleen Kaur IAS, Siaha District Bawrhsap ten Kaochao-Phura-Tokalo Bailey Bridge an hawng. Vawiin Lei hawnna inkhawmah hian Pu N.Harikhrishna EE (Civ), Officer Commanding, 71RCC chuan Technical Report pein, he Bailey Bridge hi feet 100 a sei leh lirthei Tone 30 a rit zawh thei tura siam a ni a, Kum 40- 60 thleng pawha daih thei tura rin a nih thu tarlan a ni. He Lei dawh hna hi Border Roads Organisation hnuaia 71RCC ten an thawk a ni.

Vawiin Bailey Bridge hawngtu Pu K.K. Razdan chuan Nikum 2015 khan Fur laia Kaochao lui a len chang a Mara ram khawthlang lam thingtlang khaw 10 chuang ten harsatna an tawh thin chu a hmunah ngei a lo en tawh thu sawiin, Leih dawh vat a tulziate a mit ngeiin a hmu a, chumi atan chuan hma a lak vat thu a sawi a. He Lei dawhna nana hmanrua pawimawhte hi Phai atanga lakchhuah dawn chuan kum 2 chuang hun mamawh tur a nih avangin, Project danga mi te puk chawpin leh a rem rem fawmkhawmin vawiinah hian hawn theih in a lo awm ta a ni , a ti. Pu Razdan chuan Bailey Bridge dang Kaochao khua tanga KM 9 ah pakhat an dawh leh vat tur thu a sawi langa, Tuna Bailey Bridge an dawhna thlang lawkah hian Bailey Bridge aia tha Lei dang dawh tura hmalakna kalpui mek a ni, a ti a. Pu K.K.Razdan chuan Khawtlang mipuite chu BRO tawiawm chhunzawm zel turin a sawm a, in rawngbawl tura awm kan ni, a ti bawk.

Pi Harleen Kaur, Siaha District Bawrhsap pawhin thu sawiin, Vawiin Ni hi Siaha District-a khawthlang lam khuate tan chuan ni chhinchhiah tlak a ni a. Kaochao-Phura- Tokalo Road hi “ Rice Bowl of Maraland” panna kawng a nih avangin, he Lei hian Mararam tan hmasawnna nasa taka a thlen a beisei thu asawi bawk. 71 RCC te thawhrimna-ah lawmthu a sawi a, mipui ten 71RCC an tawiawm that avanga he Lei hi dawh thei a ni, a ti bawk.

Vawiin Lei hawnna-ah hian BRO Official te bakah Pu S.Hiato Ex-Minister leh MDCC President ni bawk te, Pu S.D.Mishra IPS,SP Siaha te, IP Junior EM,MADC te, Pu S.Beirahmo Syhly Adviser to CEM, MADC te, MSO Hqrs hruaitute leh Kaochao khawtlang hruaitute leh zirlai thahnem tak an tel a ni.