Vawiin khan Mizoram State Higher Education Council (SHEC) chuan Aijal Club Conference Hall-ah an Chairman, Higher & Technical Education Minister Pu R. Romawia hovin meeting vawi 4-na neih a ni a. He hunah hian Rashtriya Uchchatar Shiksha Abhiyan (RUSA) Scheme hnuaia hma lakna hrang hrangte thlir hona neih a ni.
Meeting-ah hian Prof. K.L Pradhan, Member Secretary in hma lakna hrang hrang report a pe a. Report-ah hian RUSA hnuaiah College tih hmasawnna Infrastructure Grant dawng College 21 te hnenah (Central leh State share) Rs 12.5 lakh First Installment leh Rs. 93.75 lakh theuh pek chhuah a nih tawh thu tarIan a ni a. College hrang hrangte hi tihchangtlun zel niin an hmasawnna chu a taka hmuh theihin a awm mek zel a ni a. Heng College te hi 12th Plan chhungin Rs.200 lakh theuh hmu tura ngaih an ni. Govt. Hrangbana College leh Govt. Zirtiri Residential Science College te Model College a hlankaina tur pawh RUSA kalphung pangngai angin Rs. 400 lakh pek tura Project Approval Board (PAB)-in a phalsak tawh atangin First Installment (Central & State Share) Rs. 50 lakh ve ve pek chhuah tawh an ni. Govt. Hrangbana College-ah hian an building hman laiah Auditorium leh Classroom tur sak mek a ni a, Govt. Zirtiri Residential Science College Laboratory building Durtlang-ah sak mek a ni bawk. Mizoram Engineering College, Lunglei Pukpui a dinna tura Rs. 2,600 lakh RUSA, PAB in a phalsak pawh First Installment Rs. 1,300 lakh (central & state share) dawn tawh tawh a ni a, tunah hian hna thawh chhoh zel a nih thu tarlan a ni bawk.
RUSA Equity Initiative hnuaiah Sorkar College 24-te pawh First installment Rs. 10.41 lakh theuh pek chhuah tawh an ni a. Hemi hmang hian College tinah Language Lab siam mek a ni a. Spoken English & Hindi, Gender & Person with Disability (PwD) Sensitization Campaign, Personality Development Programme leh Remedial Class-te pawh buatsaih mek zel a ni. Tun thlengin Mizoram Sorkarin RUSA Project a state tum ve tur (State Share) a la pe ve thei zel chu lawmawm an tih thu tarlan a ni bawk.
Higher Education Institution-te hmasawn zel nan Academic Audit leh State lnstitutional Ranking hna tan a nih tur chungchang te leh, RUSA duhdana Bio-Metric Attendance, Zirtirtu, Zirlai leh Office Staff-te tana hman tan chungchang pawh he meeting-ah hian sawi lan a ni.
State Higher Education Council-ah hian Office Bearers 3 bakah member 18 awmin, State Higher Education Official te, pawl hrang hrang aiawh (Academic Associations, Chamber of Industries, YMA) leh State chhung leh pawn lam atanga Higher Education a mi thiamte an tel ni.
