Fisheries Department-in National Fisheries Development Board (NFBD) atanga pawisa a hmuh hmangin Lawngtlai District Fisheries Development Officer Pi C.Lalparmawii hovin Lawngtlai District chhunga hmun thlan bik, Diltlang leh Borapansury-a leilet nei chhungkaw 65 thlang chhuakin, an leileta sangha khawitir turin hma lak mek a ni.

Hemi atana leilet neitute an lo inbuatsaih a, leilet bial ko te siam thaa sangha dah theih tura hma an lo lak nan tanpuina Rs 4,200/- theuh pek an ni a. Department-a mi thiamte’n buh hmuna sangha khawi a thatna te, a hlawk dan leh a enkawl dan tur te a hmunah kal chilhin an lo zirtir tawh bawk a ni.

Department-in sangha note (common carp) ngaihtuahsakin, nimin (30.08.2016) khan Diltlang khuaa leiletah sangha note hi an chhuahsak a. Hemi hunah hian Fishery Extension Officer Pu K.Lalmalsawma chuan tanpuina dawngtute chu rinawm tak leh taima taka thawk tur leh khaw dang tan pawha entawn tlaka hna thawk a, hlawhtlinpui ngei turin a chah a ni.

Diltlang area zawhah hian Borapansury area-a chhungkaw 45 hnenah sangha chi hi sem leh tura hma lak mek a ni bawk.