730/2023-2024

Kolasib dated 9th June 2023: Tukin khan Excise & Narcotics Department Complex, Khuangpuilamah District Level Green Mizoram Committee bultumin ‘Thing phun ila, I enkawl zui ang u’ tih thupui hmang a Green Mizoram Day 2023 pual a hun hmanna chu Pu K.Laldawngliana, MLA chuan khuallian niin a hman pui a. Pu John LT Sanga, Deputy Commissioner chuan hun kaihruaiin Kolasib district chhung khaw hrang hranga ram kang venna kawnga hma la tha thlanchhuah te hnenah lawmman sem nghal a ni.

Khuallian Pu K.Laldawngliana, MLA chuan ram leilung hausakna, boruak thianghlim leh tui hna te chu kan hlut thiam a pawimawh thu leh kan tu leh fate tan ram nuam leh chenna tlak kan siam theih nan heng leilung huasakna te hi kan humhalh zel a tul thu a sawi. Ram changkang apiangah ram ngaw leh nungcha humhalh leh thing phun kawng ah hma nasa tak a an lak thin thu MLA chuan sawiin Kolasib district chhungah pawh Green Mizoram Day pual a thing phun bak ah mahni thahnemngaihna a ram ngaw humhalh leh thing phun uar zel turin kalkhawmte a fuih bawk a ni. Pu K.Laldawngliana chuan Kolasib District chhung a Office hrang hrang hotute chu an hnathawhna theuh ah kawng emaw tal a hmasawnna thlentu ni tur a fuihin ram tan an theihna leh thiamna te tangkai tak a hmang turin a chah. Green Mizoram day 2023 thupui ‘Thing phun ila, I enkawl zui ang u’ tih chu a tak a tihlawhtlingtu ni turin kalkhawmte a fuih a, thing phun bak ah a enkawl puitlin zui chu mi tin mawhphurhna pawimawh tak a nih thu a sawi.

Pi Margaret Lalramchhani, IFS, DFO, Kolasib chuan Green Mizoram Day 2022 khan thing tiak 2857 phun tur a sem chhuah a nih thu tarlangin Sawrkar department hrang hrang hmun ahte, School leh Institution-ahte, mimal leh pawl ahte sem a ni a. DC Circuit House Complex, Banglakawn, Builum leh Tuilutah te thing phun a nih thu a sawi. Green Mizoram Day 2023 pual hian Excise & Narcotics Department Complex, Khuangpuilamah hian thing 7 phun a ni a, BDO, Thingdawl Compound-ah Department hrang hrangin thing 162 an phun bak ah pawl, mimal a duh apiang tan thing tiak sing khat ruahman a nih thu a sawi.

Kolasib district-a kum 2022-23 chhung a ram kang ven kawng a hma la tha thlanchhuah khaw pathum hnen ah lawmman sem a ni a. Bairabi North chuan lawmman pakhatna lain, chawimawina thuziak leh pawisa fai cheng sing nga an dawng a, Saipum chuan pahnihna niin cheng sing thum an dawng a, Hortoki chu pathumna niin cheng sing hnih an dawng a ni. Mizoram district hrang hrang, ram kang ven kawng a hma la tha lawmman pathumna chu Kolasib district hian an dawng bawk a ni.

Green Mizoram Day 2023 pual a inkhawm ah hian Pu Lalmuan Puia, SDO (Sadar) in kalkhawmte lawmna thu a sawi a. Kolasib khaw chhunga Sawrkar department hrang hrang hotute, khawtlang leh tlawmngai pawl hruaitute an tel a ni.

Attachment

  • Loading attachment...