Dt. 15-30.01.2016 chhung hian Pu K.S. Thanga, Parliamentary Secretary in Myanmar ram thla chanve lai thangin a tlawh a, Democracy hawi zawnga ke a pen tak avanga sorkar tam takin an thlir rawn anih mek chungchang han zirchiang tur leh Zo hnahthlak te dinhmun chungchang a thil hmuh leh hriat, ram tana pawimawh tur nia a hriat te vawiin hian a Office Chamber-ah Central Y.M.A hruaitute a sawipui.

Pu K.S. Thanga chuan November, 2015 a Myanmar ram Election-ah NDL in hneh taka chakna an chan hnu hian, an ram kalphung chu nasa taka sawi danglam mek a ni a, a ram mipuite pawh Democracy hmachhawn turin an in ruahman mek a, khawvel ram hausate mit fukna ber an ni mek bawk a ni. Hun reiloteah Foreign Investor lian te an ram hausakna khian a hip hle a rin thu YMA hotute hi a sawipui bawk a, Myanmar ram hi South-East Asia tan Economic gateway pawimawh tak anih angin, India ram pawhin heng English language training te, agriculture leh IT Sector-ah te investment lian tak an kalpui mek a. China ram pawhin tunah hian dollar 33 billion chuang an invest mek a, hei hi Myanmar ram foreign investment 42% a tling hial a ni. Tunah hian ram hausa tam tak leh Company lian pui pui in luh tumin ruahhmanna an nei mek a, hei hian Burma ram mipui te tan hmasawnna leh hamthatna lian tham tak a thlen ngei dawn niin a lang a, he hmasawnna leh hamthatna hi Mizo thalaite pawh a chhawr leh dawng ve phak dinhmunah kan din theih avangin ngaihtuahna sorkar leh YMA ang pawha kan hman tlan tha a tih thu a sawi a.

Tahan,Mandalay, Rangoon-ah pawh Mizo tam tak awmin eizawnna lamah pawh ngelnghet tak tak an ni hlawm a. Tin, NGO inzawmkhawm mumal tak an nei vek bawk a ni. Khingte nen khian inzawmna tha tak thangtharte hmalam thlir ranakanneih zel theih nan YMA te pawn tan laturina sawm bawk a ni.

British in India ram a chhuahsan dawn khan Mizo te chu International Boundary pa thum (3) - Burma, India, East Pakistan (Bangladesh) ah te min then darh a, India ram chhung ngeiah pawh State pali (4) - Manipur. Assam, Tripura leh Mizoram ah te min la then sawm leh zel a. nimahsela heti chung hian Mizo kan nihna leh kan in unauna te hi eng boundary mahin a then hran theih a ni lo, khawi hmunah pawh awm mah ila Mizo nihna hi kan inpumkhatna tha ber a ni a, he inpumkhatna kengkawh tur hian Y.M.A aia tha hi Mizote hian pawl dang kan nei chuanglo a, Chuvangin Y.M.A hruaitute chu nu leh pa chan chang thiam turin a ngen nghal bawk a ni.