Vawiin khan Agriculture Minister Pu KS Thanga chuan Kolasib District a Chemphai hmuna Sawrkar hmalakna hrang hrang te a tlawh.
Minister chuan North Chawnpui to Phaidam zau Agriculture Link road laih chu a hmunah kalin a tlawh a, Agriculture Department hotute nen hnathawh kalphung tlangpui leh harsatna hrang hrang awm thei te sawiin a sutkian dan tur te pawh ngaituah nghal turin a chah. He link road hi km 2 a thui niin NEDP atangin cheng Nuai 10 senga laih a ni. Minister chuan Chemphai a KVK Agriculture farm a tlawh bawk a , he hunah hian Dr. Michelle C.Lallawmkimi, Senior Scientist and Head, KVK chuan an hmalakna hrang hrangte a lo hrilhfiah a an thil mamawh leh harsatna hrang hrang an neih te chu a sawipui bawk a ni. Pu KS Thanga chuan KVK hnathawh chu kuthnathawkte tan zirtirtu thatak a ni tiin thlai leh huan lo ram enkawl na kawnga kawngdik kawhhmu tu an nih angin an thiamna te chu mizoram puma kuthnathawkten an chhawr tangkai theihnan hma la turin a fuih a ni. KVK chu Central Sawrkar hnuaia awm ni mahse chak zawk leh zau zawka hna an thawh theihna turin Mizoram Sawrkar chuan puih a inhuam reng thu a sawi a, KVK a thawk Scientist te chu an thil hmuh chhuah leh an thiamna te chu mi harsa zawk te ina an hlawkpui ve theih nan thahnem ngai taka thawk turin a chah bawk ani. Hemi bakah hian Irrigation & Water Resources Department hmalakna hnuaia kuthnathawkte tana tui khawlna tur hmun siam mek Lift Irrigation Project chu a tlawh bawk a, tui lakna kawng siam mek leh tui khawlna hmun te chu a hnathawh dan tur kalphung an lo hrilhfiah a ni. Chemphai Lift Irrigation Project hi NABARD atanga sum nuai 174.30 senga siam a ni a, hectare 70 a zau niin kuthnathawk chhungkaw 30 in an chhawr thei dawn ani.
Agriculture Minister hi Pu R.Lalrinliana, Director Rtd (R&E), Agriculture, Pu R Lalnunzira, DAO Kolasib leh Pu Lalchhandama, EE, Irrigation & Water Resources Dept, Kolasib ten an tawiawm a ni.
