1955/2024-2025

Aizawl, 7th September, 2024 : Nimin (Zirtawpni) tlai khan Pu K. Sapdanga, Home Minister chuan RB Mc Cabe Hall, Aijal Club-ah Land Revenue & Settlement Department hnuaia  Instituting of Empanelled Survey Firms hun khuallian niin a hmanpui a,  Forest minister Pu Lalthansanga, Revenue Minister Pu B. Lalchhanzova, Sports minister Pu Lalnghinglova Hmar, AMC Mayor bakah sorkar official mi ṭhahnem tak an tel a ni.

Khuallian Pu K. Sapdanga chuan mipuite leh a mamawh apiangten an hman tura Empanelled Firms  hlanna hun hman paha thusawiin, "Vawiina empanelled survey firms chungchang hi chanchinbua a lo lan aṭang khan ka lo ngaihtuah ve ṭan a, tlem lai khan Aizawl khaw pawn deuhah khian huan zau deuh ka lei ve a, Revenue Department lamah in hmun turin min siam sak teh u tiin kan ngen a, rei ngial kan nghah hnuah pawh min teh sak hlei thei lo a, a tawpa tawpah min teh sak ta a, kan teh fel hnu chuan sorkarah Tax ka chhung ta ṭawk ṭawk mai a, sorkara tax sang zawk ka pek theihna tur min teh fel sak thei mai lo kha a mak ka ti hle. Vawiinah chuan heng kan empanelled survey firms hmang hian chung harsatna chu sutkianin a awm dawn ta a, hnung lam hawia sorkar kal ṭhin khan vawiin aṭang chuan hmalam a pan dawn ta niin ka hria a, a lawmawm hle. Sorkar hausakna chu chhiah aṭangin a ni a, sorkar hausa lo aṭangin mipui hausa a awm hlei thei lo va, sorkar a hausak chuan mipui pawh hi a hausa dawn a ni. Property tax te kan han pe ve chho ta a, kan chawi loh tur chawi emaw intia chhiah kan pek hian rilru a na ṭhin a, kan hmasawnna tura pe kan ni tih kan hriat hian kan rilru pawh a nuam ṭhin a, hei hi kalphung thar, mipui tana sorkar tia chhal ngam niin ka hria. Vawiina kan empanelled firms te ka chah duh chu sum siamna atan ni lo, ram siam ṭhatna atana ke pen turin kan beisei che u a ni. Chhawr tlak chu kan chhawr zel dawn a, he ram siam tum hian in beih tak tak teh ang u. Hna zahawm in thawk dawn a, ram tana ṭhahnemngai taka in thawh chuan malsawmna in dawng ngei ngei ang tih ka ring tlat a ni. Hmasawn kan tum chuan mipuite hian chhiah kan pek tam a ngai a, ram changkangah chuan chhiah pekna thar an siam tam hi intihsiakna atan an hmang ṭhin a, vawiinah bung thar kan kai hi a lawmawm tak zet a ni. Kan rama thil mak em em chu chhiah petu mipui chhiah pe turin kan la intlar fo mai te hi a ni a, kan empanelled firms te pawh mipui dawr nuam taka awm ngei ngei turin kan chah mawlh mawlh che u a ni. Revenue Department-a awm te pawh Department dang aiin kan beisei sang che u a, sorkar sum kung in nih avangin hawihhawmna tin reng nen mipui lo dawr turin ka chah che u a ni. He ram hian chhiah pek khawpa pen khatin hma a sawn dawn a, vawiina kan thil tih hi a hlut zia kan la hre telh telh dawn a ni, " a ti bawk.

Pu B. Lalchhanzova, Revenue Minister pawhin thusawiin, "Vawiina kan hun hman mek hi video coverage neih a ni a, hun lo la kal zel turah pawh thlir theih tura ruahmanna siam a ni a. Vawiina kan ruahmanna siam hi a ṭha ber a ni lo ang tih kan ring a, kan ramin a mamawh tawh si avangin hetiang ruahmanna hi siam a ni ta a ni. Department lama thawktute inpekna a nasa hle a, anni zarah heng hi kan puitlin thei ta a, an thawhrimnaah lawmthu ka sawi tak meuh a ni. Empanelled firms hi sorkar hmasa hun aṭanga ruahmanna lo awm tawh a ni a, tling lo tak chunga mawhphurhna ka lak ve chinah a theih ang angin kan bawhzui chho ve mawlh mawlh a, biak rawn theih ang ang te pawh be kualin ram tana mi ṭhahnemngai tam tak thurawn min petu ka hmu a, chung mite zarah chuan he thil hi a hlawhtlinna kan hmu thei dawn ta a ni. Hna bul kan ṭan dawn a, mipuite nena inzah tawn taka indawr ṭhin turin empanelled survey firms zawng zawng ka chah duh che u a ni. Kan phak ang angin State dang tih dan te pawh kan han zir ve a, vawiina ka duh ber chu, sawipuitu nei lo mipui ten samkhai leh awlsam zawka an ram an teh fel ve zung zung theih hi a ni a, a changtu Minister hmingṭhat hlawh tum vang te, lar khelh vang te lam he thil hian a hawi lo a ni. Vawiinah Firms 13 te nen kan thawk ho dawn a, tha tak leh rinawm taka thawk turin ka ngen che u ani ati. Land Revenue Department te mipui lamin dawr khirh tak, biak har tak anga min sawi ṭhin te hi a theih ang anga nawhreh kan tum a, chutiang tur chuan nasa takin kan inbuatsaih zel dawn a ni. Central sum a tam thei ang ber thal chhuak turin hmalak kan tum a, tuna Aizawl a Settlement Office hmun khat chauha kan neih ṭhin chu Aizawl North leh Aizawl South-ah then fel a ni ta bawk a, hna thawktu ṭhahnemngai tak tak hmel kan  hmu chho ta te hian min tilawm hle a, he Department hi mipuite tan nasa zawkin inpekna thuk zawk nen kan thawk zel dawn a ni" a ti bawk.

He hun hi Dr. H. Lalthlangliana, MCS, Secretary to the Government of Mizoram LR&S department-in a kaihruai a, Pu V. Lalduhzuala, Director Land Revenue & Settlement chuan technical report a pe a, Pu Lalhmunsanga Additional Secretary to the Government of Mizoram Land Revenue & Settlement Department chuan lawmthu a sawi a ni.