Nimin khan Pu K.S. Thanga, Parliamentary Secretary, Horticulture etc. chuan Zamuang khua-in a an buatsaih Kuhva Kutpui khuallian niin a hmanpui.

Kut hmanna hun Zamuang khelmuala buatsaih, Pu Zarzoliana, President, V/C kaihhruaiah Khuallian Pu K. S. Thanga Parliamentary Secretary chuan Zamuang khua, zoram hmun dang atanga hriat hlawh vak lohvin mahni thawhrah hming chawia Kuhva Kutpui a buatsaih hi a ropuiin a chhinchhiah tlak hle a ni tiin, a lawmpui thu a sawi a. Mahni thawhchhuah ngei ringa intodelh khua an ni thei hi a ropuiin an taimakna leh tumruhna fakin Zoram mipuite tan khaw entawn tlak an nih thu a sawi bawk a ni. Khuallian chuan ram ngaw ti chereu zawnga eizawnna kalpui lova eizawnna nghet neih a ramngaw humhalh leh siam belh tuma sawrkarin hma a lak mekna chu Kuhva hmangin Zamuang khua in a ti hlawtling thei hi a ropui tak zet a ni a ti a. A hralhna kawnga harsatna awm thin te chu sawrkarin hria in hlawk zawka hralh anih theih nan sawrkarin hma a lak tur thu a sawi lang bawk.

He Kuhva Kutpui ah hian Pu R.S. Lalzamliana Addl. DC Mamit chu “Kut Pa” a ni. Kum 2011 chhunga Zamuang khua, Kuhva atanga Cheng nuai khat (Rs. 1,00,000/-) tel chin chhungkua 47 te hnenah chawimawina Certificate khuallianin a hlan a ni.

Zamuang khua-in ‘Kuhva Kutpui” an hman lawmpui nan Pu Lalrinmawia Ralte, Parliamentary Secretary, Bialtu MLA ni bawk in Rs. 30,000/- a pe a ni. Zamuang khua hi in 250 niin mihring 1658 an cheng mek a, Kuhva atang hian kum 2011 khan Rs. 1,96,24,300/- an tel a, mi pakhatin Rs. 11,836/- la lut ang an ni.

Zamuang khuaah hian Pu Saikhalha’n kum 1970 khan Kuhva kung 5000 phunin bul a tan a. Pu Saikhalha hian kum 2011 khan Rs. 11,00,000/- a tel a ni. Tunah hian Zamuang khuaah hian Kuhva phun tawh zat hi kung 5,19,601 a ni.

Pu K.S.Thanga hi Sorkar mi pawimawh thahnem takin an tawiawm a, Kut lawmna atan ruai buatsaih a ni bawk.