Mizoram Governor thar atana ruat Pu Kummanam Rajasekharan chu vawiin chawhma dar 11:30 khan Raj Bhavan Durbar Hall-ah rinawmna thu tiam tira lakluh a ni a. Governor lakluhna inkhawmah hian Chief Secretary Pu Arvind Ray chuan President Pu Ram Nath Kovind-a’n, Pu Kummanam Rajasekharan, Mizoram Governor atana a ruatna lehkha Warrant of Appointment a chhiarchhuah hnuin Gauhati High Court Chief Justice Pu Ajit Singh chuan rinawmna thu tiam tirin Pu Kummanam Rajesekharan chu Mizoram Governor atan lakluh a ni.

Governor thar lakluhna inkhawm-ah hian Chief Minister Pu Lal Thanhawla, Assembly Speaker Pu Hiphei, Minister, Deputy Speaker leh MLA te, Chief Minister hlui Pu Zoramthanga bakah sawrkar mi pawimawh thahnem tak an tel a ni.   

Pu Kummanam Rajasekharan hi Mizoram Governor ni turin vawiin khan chawhma dar 10:30-ah Thuampui Helipad a lo thleng a. Chief Minister Pu Lal Thanhawla bakah Chief Secretary, DGP, Secretary to Governor, Aizawl DC leh sawrkar mi pawimawh dangte'n an lo hmuak a ni.

Vawiina rinawma thu tiam tirna neih zawh khan Mizoram Governor thar chuan Mizoram mipuite chibai bukin, kawng tinrenga hmasawnna a ngaihpawimawh hmasak ber thu a sawi bawk a ni.

May 25 zan khan Pu Kummanam Rajasekharan hi Mizoram Governor atan ruat a ni a. Lt. Gen. Nirbhay Sharma tenure chu nimim, May 28-ah khan tawpin, Chief Minister Pu Lal Thanhawla ho a thlah liam a ni.

Pu Kummanam Rajase­kharan hi December 23, 1952-ah Kottayam district-a Kummanam-ah a piang a, CMS College Kottayam aá¹­angin B.Sc. (Botany) a zo a, Postgraduate Diploma in Journalism a zo leh bawk a ni. Chanchinbu hrang hrangah sulhnu a lo nei tawh bawk a ni.