Vawiin chawhma dar 11:00Am khan D.C’s Conference Room-ah Kumin 2018 a Mizoram Board of School Education (MBSE) in HSLC leh HSSLC Result a tihchhuah taka Siaha District chhung School hrang hranga Hmeichhe Naupang ti thate hnenah chawimawina leh lawmpuina hun hman a ni.

He hun hi Siaha District Bawrhsap Pi Harleen Kaur IAS in a hmanpui a, Siaha District School hrang hrang atangin Zirlai 19 (sawm leh pakua)te hnenah chawimawina leh lawmpuina thilpek hlan a ni. Thilpek hian Tangkafai leh Citation bakah Dictionary te a keng tel a, zirlaite hi an nu leh pate bakah zirtirtute’n an tawiawm a ni.

Vawiin hmeichhe naupang zirlai lawmpuina leh chawimawina hun hi Central Sawrkarin Hmeichhe naupang hmakhaw ngaia Scheme a kalpui mek Beti Bachao Beti Padhao (BBBP) bultum a buatsaih a ni a, he scheme hian inthliar hranna awm lova rualkhai taka hmeichhe naupangte’n zirna an dawn a, chhungkua leh khawtlanga chanvo an chan theih nan hma a la mek a, hmeichhe naupangte himna leh hmasawnna turin he scheme hian kawng hrang hrangin beihpui a thlak mek a ni.

Vawiin programme hmanna a Zirlai chawimawite chu :- HSLC ah - (i) Little Diamond English School atangin C. Roselyne, Cecilia V. Lalroluahpuii, Hadasi Lalrintluangi leh Remnalalruati te an ni a, (ii) Southern English Comprehensive Academy atangin - C. Lalnuntluangi, Lalchhuanawmi Jinhlawng, Lalnunsangpuii leh Vanneihpuii te niin, (iii) Hill Gate School atangin - HC. Angela Ngohie, K. Chinneihkimi, Lalhmingsangi leh S. Malsawmtluangi te a ni a, (iv) Grace Academy atangin - Miranda Vytuchho leh (v) Don Bosco High School atangin - Sarah T. Chozah te an ni. HSSLC Arts Stream-ah (i) Meleti Lalbiaknii, Tipa ‘V’ Centenary HSS ; Science Stream atangin - (i) H. Lalmuanawmi, GHSS, Siaha leh Don Bosco HSS atangin C. Jecyline, Manisha Kumari leh Rebeki Lalhriatpuii te hnenah lawmpuina leh chawimawin thilpek hlan an ni bawk.