Vawiin khan Rural Development Minister Pu R.Lalzirliana chuan Rural Development Department Conference Hall-ah  State  pum huap, thingtlang mite tana insak tanpuina, Chief Minister's  Rural Housing Scheme(CMRHS) chu a hawng. 

CMRHS hawngtu,  Rural Development Minister Pu R.Lalzirliana chuan sawrkarin miretheite chawikan leh chhawmdawl a ngaihpawimawhna rilru atangin thingtlang mite puala insak tanpuina scheme chu duan a ni a ti. Sawrkarin mi harsa tak tak te dinhmun a hriatchian avangin anmahni chhawmdawlna turin scheme tam tak kaltlangin tanpuina sum te a sem thin a. Chu chu sem policy tiin mi thenkhat awmthei zawk ten an sawi mai thin a, mirethei zawk te dinhmun leh harsatzia an hrechianglo hle a ni a ti. RD Minister chuan Rs 50,000/- insak tanpuina chuan chenna in tlabal tawh deuha cheng ten an in thawm that nan te leh mi khawsak harsa zawk in thar sak tum mek te tan pawh a tangkai hle dawn a ni a ti a. CMRHS beneficiary te hi a tul chuan sawkarin Rural Housing Support tanpuina kaltlanga puihdan te pawh a la dap zel ang a ti a. Mirethei zawkte puala sum dahhran a nih angin a dawngtu tur diktak thlanchhuah kawngah pawh CMRHS scheme buaipuitu sawrkar hnathawkte fimkhur taka thawk turin a chah a ni. 

CMRHS hi New Economic Development Policy(NEDP)  hnuaia hmalakna a ni a; thingtlanga cheng, khawsak harsa  zual, mahni thawhchhuah atanga chenna in  sakna tur leh thawm thatna tur sum neizo lo te tan bik a duan a ni . He scheme kalpui tur hian Rural Development Department chu Nodal Department  a ni a; Rural Development Department atang hian  tanpuina sum hi  District Level-ah District Rural Development agency(DRDA) te  kaltlangin  beneficiary ten an dawng leh dawn a ni. He Scheme hnuaia tanpuina dawngtute thlangchhuak turin District Bawrhsapte kaihhruaina hnuaia District Level Selection Committee a awm a; tin, he sum hmandan hi kumtin endik a ni dawn a ni.

CMRHS hi 2016-17 chhung khan    Serchhip, Lawngtlai leh Saiha District-ah te  Rs 600 lakh sengin kalpui a lo ni tawh a, kumin hian  Kum 2017-18 budget a Rs 1000 lakh CMRHS atana dah chu Aizawl, Lunglei, Kolasib, Champhai leh Mamit District chhungah te mi harsa zawk insak tanpui nan hman a ni dawn a ni.  Aizawl District atan Rs 157.50 lakh dah niin tanpuina dawngtur mi 315 thlanchhuah tawh an ni a; chhungkaw pakhat  tan Rs.50,000/- zel ruahman a ni a. CMRHS Beneficiary thlanchhuah zat chu - Aizawl District-ah chhungkaw 499, Champhai-ah 415, Lungleiah 619, Mamitah 300, Kolasibah 167, Serchipah 200, Lawngtlaiah 500 leh Saihaah 500 an ni. He Scheme hi sawrkar chuan kalpui zel tha tiin ruahmanna thar pawh a siam leh tawh a ni. 

CMRHS hawnna inkhawm hi Rural Development Commissioner & Secretary Pu Lalhmingthanga'n a kaihruai a; CMRHS chungchangah RD Director Pu Lalhriatpuia'n report pe in Deputy Speaker Pu R.Lalrinawma,MLA, ZIDCO Chairman Pu Lalrobiaka, MLA, Mizoram Law Commission Chairman Pu John Siamkunga, MLA, Pu Lalrinliana Sailo, MLA, Lt Col(Retd) ZS Zuala, MLA, Pu T. Sangkunga, MLA, Pu Nihar Kanti Chakma, MLA leh R.Lalruakima, MLA te pawh he hunah hial an tel a ni.