No.2418/2021-2022

Aizawl, 1st October, 2021 : New Delhi-a cham mek Mizoram Rajya Sabha MP Pu K.Vanlalvena leh Pu Rosangzuala OSD to Chief Minister te chuan Mizoram tan Central sawrkar hotute leh thuneitute an dawr chhunzawm zel a. Nimin tlai khan Union Minister of State for DoNER Pu B.L.Verma chu a chenna in Swarna Jayanti Sadan ah hmu in Mizoram tana thil pawimawh te an thlen a ni.

DONER Minister hnenah hian Lawngtlai to Paletwa kawng laih mekah Myanmar ram chhunga harsatna awm chungchang an thlen a. Hemi chungchanga Chief Minister Pu Zoramthanga'n hma a lo lak tawh dan report pawh an pe nghal a. He kawngpui hi Mizoram tan chauh ni lovin, India sawrkar Act East policy tih hlawhtlinna tur leh ram venhimna chungchang atana thil pawimawh tak a nih avangin harsatna hi sutkian thuai a tul thu an thlen a. Mizorama Myanmar raltlan awm mek te chu Central sawrkarin tun aia nasa zawka a ngaihtuah a tul thu an thlen bawk a ni.

Mizoram MP leh OSD te chuan Aizawl khawpuiah Convention Centre siam ngei a tul thu leh chumi atana ruahmanna awm mek pawh DONER Minister hnenah hian an thlen bawk a ni.

Pu B.L Verma chuan October thla ah Mizorama lo zin a duh thu leh a tul ang apiang chu Mizoram Chief Minister nena sawi dun a inhuam thu Mizoram aiawha amah dawrtute hi a lo hrilh a ni.